Sunan Al Daraqutni: Hadith 3276

3276 ۔ حضرت عبدالرحمن بن ازہر (رض) بیان کرتے ہیں : غزوہ حنین کے موقع پر میں نے نبی کریم (صلی اللہ علیہ وآلہ وسلم) کو دیکھا آپ لوگوں کے درمیان میں سے گزرتے ہوئے حضرت خالد بن ولید (رض) کی جائے قیام کے بارے میں دریافت کررہے تھے آپ (صلی اللہ علیہ وآلہ وسلم) کے سامنے نشے میں مدہوش ایک شخص کو لایا گیا تو آپ کے حکم کے تحت آپ کے آس پاس موجود لوگوں نے اپنے ہاتھوں کے ذریعہ اس شخص کی پٹائی کی ، نبی کریم (صلی اللہ علیہ وآلہ وسلم) نے خود اس پر مٹی پھینکی۔
پھر حضرت ابوبکر (رض) (کے عہد خلافت میں ان کے سامنے) ایک مدہوش شخص کو لایا گیا تو انھوں نے اسے سزا دیتے ہوئے چالیس کوڑے لگوائے۔
ابن وبرہ کلبی بیان کرتے ہیں : حضرت خالد بن ولید (رض) نے مجھے حضرت عمر (رض) کے پاس بھیجا وہ کہتے ہیں جب میں حضرت عمر (رض) کی خدمت میں پہنچا تو اس وقت ان کے پاس حضرت عثمان غنی (رض) ، حضرت عبدالرحمن بن عوف ، حضرت علی ، حضرت طلحہ (رض) اور حضرت زبیر (رض) بھی موجود تھے ۔ یہ سب لوگ مسجد میں ٹیک لگا کر بیٹھے ہوئے تھے میں نے کہا، حضرت خالد بن ولید (رض) نے مجھے آپ کی خدمت میں بھیجا ہے انھوں نے آپ کو سلام کہا ہے اور یہ گزارش کی ہے : لوگ شراب زیادہ پینے لگے ہیں اور وہ اس کی سزا کو کوئی اہمیت نہیں دیتے تو حضرت عمر (رض) نے فرمایا : یہ حضرات یہاں تمہارے سامنے تشریف فرما ہیں تم ان سے اس بارے میں دریافت کرو تو حضرت علی (رض) نے فرمایا، ہمارا یہ خیال ہے جب (شراب پینے والاشخص ) مدہوش ہوگا تو ہذیان بکے گا اور ہذیان بکے گا تو افتراء (زناکا جھوٹا الزام) لگائے گا اور افتراء کی سزا اسی کوڑے ہے تو حضڑت عمر (رض) نے فرمایا انھوں (حضرت علی (رض)) نے جو کہا ہے وہ اپنے صاحب (حضرت خالد بن ولید (رض)) تک پہنچا دینا۔
راوی بیان کرتے ہیں : جب حضرت عمر (رض) کے سامنے کسی کمزور شخص کو لایاجاتا جس نے یہ جرم کیا ہوتا تو وہ اسے چالیس کوڑے لگواتے تھے۔ حضرت عثمان غنی (رض) بھی (کسی کو) اسی اور (کسی کو) چالیس کوڑے لگواتے تھے۔