Sunan Al Daraqutni: Hadith 3556

3557 ۔ حضرت عبداللہ بن مسعود (رض) بیان کرتے ہیں : ایک خاتون نبی کریم (صلی اللہ علیہ وآلہ وسلم) کی خدمت میں حاضر ہوئی اس نے عرض کی یارسول اللہ میرے بارے میں اپنی رائے (بیان کریں ) نبی کریم (صلی اللہ علیہ وآلہ وسلم) نے دریافت کیا اس کے ساتھ کون شادی کرے گا، ؟ ایک صاحب کھڑے ہوئے جنہوں نے ایک چادر اوڑھ رکھی تھی، جو انھوں نے اپنی گردن میں باندھی ہوئی تھی، انھوں نے عرض کی یارسول اللہ میں (اس کے ساتھ شادی کروں گا) نبی کریم (صلی اللہ علیہ وآلہ وسلم) نے دریافت کیا، کیا تمہارے پاس مال ہے ؟ انھوں نے عرض کی یارسول اللہ نہیں ہے۔ نبی کریم نے ان سے فرمایا تم بیٹھ جاؤ، پھر وہ خاتون دوبارہ آئی اس نے عرض کی یارسول اللہ میرے بارے میں اپنی رائے (بیان کریں) نبی کریم (صلی اللہ علیہ وآلہ وسلم) نے دریافت کیا اس کے ساتھ کون شادی کرے گا، ؟ وہی صاحب کھڑے ہوئے اور انھوں نے عرض کی : یارسول اللہ میں ۔ نبی کریم (صلی اللہ علیہ وآلہ وسلم) نے دریافت کیا تمہارے پاس مال ہے ؟ اس نے عرض کی یارسول اللہ نہیں۔ نبی کریم (صلی اللہ علیہ وآلہ وسلم) نے فرمایا تم بیٹھ جاؤ ! پھر وہ خاتون دوبارہ آئی اس نے عرض کی یارسول اللہ میرے بارے میں اپنی رائے (بیان کریں) نبی کریم (صلی اللہ علیہ وآلہ وسلم) نے دریافت کیا اس کے ساتھ کون شادی کرے گا، ؟ وہی صاحب کھڑے ہوئے اور انھوں نے عرض کی : یارسول اللہ میں ۔ نبی کریم (صلی اللہ علیہ وآلہ وسلم) نے دریافت کیا تمہارے پاس مال ہے ؟ اس نے عرض کی یارسول اللہ نہیں۔ نبی کریم (صلی اللہ علیہ وآلہ وسلم) نے دریافت کیا، کیا تمہیں قرآن (زبانی ) آتا ہے ؟ اس نے عرض کی جی ہاں ، سورة بقرہ اور منفصل سورتیں (زبانی یاد ہیں) نبی کریم (صلی اللہ علیہ وآلہ وسلم) نے فرمایا میں اس شرط پر تمہاری شادی اس کے ساتھ کرتا ہوں کہ تم اسے قرآن پڑھناسکھاؤ گے اسے تعلیم دو گے اور جب اللہ تعالیٰ تمہیں رزق عطاء کرے گا، تو تم اس کا مہر اسے دے دو گے ، تو ان صاحب نے اس شرط پر اس خاتون کے ساتھ شادی کرلی ۔
اس روایت کو نقل کرنے میں عتبہ بن سکن نامی راوی منفرد ہیں اور یہ متروک الحدیث ہیں۔