Sunan Al Daraqutni: Hadith 3739

3740 ۔ سیدہ زینب بنت جحش (رض) بیان کرتی ہیں : قریش سے تعلق رکھنے والے چند افراد نے مجھے نکاح پیغام بھیجا تو میں نے اپنی بہن حمنہ بنت جحش (رض) کو نبی کریم (صلی اللہ علیہ وآلہ وسلم) کی خدمت میں بھیجا تاکہ میں آپ (صلی اللہ علیہ وآلہ وسلم) سے اس بارے میں مشورہ لوں، تو نبی کریم نے اس سے فرمایا : وہ اس شخص کے ساتھ شادی کیوں نہیں کرتی، جس نے اسے اس کے پروردگار کی کتاب اور اس کے نبی کی سنت کی تعلیم دی ہے ، حمنہ نے دریافت کیا یارسول اللہ ! وہ کون شخص ہے نبی کریم (صلی اللہ علیہ وآلہ وسلم) نے فرمایا زید بن حارثہ، تو حمنہ کو غصہ آگیا، اس نے عرض کی : یارسول اللہ کیا آپ (صلی اللہ علیہ وآلہ وسلم) اپنے چچازاد کی شادی اپنے (آزاد شدہ، سابقہ) غلام کے ساتھ کریں گے ؟
سیدہ زینب (رض) بیان کرتی ہیں : حمنہ میرے پاس آئی اور مجھے اس بارے میں بتایا تو مجھے اس سے زیادہ غصہ آیا اور میں نے اس سے زیادہ سخت الفاظ استعمال کیے تو اللہ نے یہ آیت نازل کی :'' کسی بھی مومن مرد یا عورت کو (اس بارے میں اختیار نہیں ہے) کہ جب اللہ اور اس کا رسول کسی معاملے میں فیصلہ دیں تو انھیں اپنے اس معاملے میں (اس فیصلے سے مختلف کام کرنے) کا اختیار ہو۔
سیدہ زینب (رض) بیان کرتی ہیں : میں نے نبی کریم (صلی اللہ علیہ وآلہ وسلم) کو پیغام بھیجا آپ (صلی اللہ علیہ وآلہ وسلم) جس کے ساتھ چاہیں میری شادی کروادیں ، نبی کریم (صلی اللہ علیہ وآلہ وسلم) نے زید بن حارثہ (رض) کے ساتھ میری شادی کروادی میں نے ان کے ساتھ تیز مزاجی کا مظاہرہ کیا تو انھوں نے میری شکایت نبی کریم (صلی اللہ علیہ وآلہ وسلم) سے کی، نبی کریم (صلی اللہ علیہ وآلہ وسلم) نے فرمایا تم اپنی بیوی کو اپنے ساتھ رکھو (یعنی اسے طلاق دینے کانہ سوچو) اور اللہ تعالیٰ سے ڈرو۔
اس کے بعد انھوں نے باقی حدیث ذکر کی ہے۔