Sunan Al Daraqutni: Hadith 4022

4022 ۔ حضرت جابر بن عبداللہ (رض) بیان کرتے ہیں : کہ ایک مرتبہ ہم نبی کریم (صلی اللہ علیہ وآلہ وسلم) کے ساتھ ایک سفر پر تھے یہاں تک کہ اسواف، کے مقام پر ہم ایک خاتون کے پاس پہنچے جو خارجہ بن زید کی دادی تھیں ہم اس دن ان کے پاس ٹھہر گئے انھوں نے ہمارے لیے کپڑا بچھایا اور ہم کھجور کے درخت کے نیچے اس پر بیٹھ گئے ، اس خاتون نے ہمارے لیے بکری ذبح کروائی پانی کا مشکیزہ لاکر رکھا اس دوران ہم گفتگو بھی کرتے رہے اسی دوران ایک خاتون اپنی دوبچیوں کو لے کر حاضر خدمت ہوئی اور عر ض کی یارسول اللہ یہ ثابت بن قیس کی صاحبزادیاں ہیں (راوی کو شک ہے شاید یہ الفاظ ہیں) سعید بن ربیع کی صاحبزادیاں ہیں جو آپ کے ساتھ غزوہ احد میں شہید ہوگئے تھے ان کے چچا نے ان کا مال اور وراثت کا حصہ اپنے قبضے میں لے لیا ہے اس نے ان دونوں کے لیے کوئی مال نہیں چھوڑا، سب حاصل کرلیا ہے یارسول اللہ آپ کی اس بارے میں کیا رائے ہے اللہ کی قسم جب تک ان دونوں کے پاس مال موجود نہیں ہوگا ان دونوں کی شادی نہیں ہوسکتی۔ تو نبی کریم نے ارشاد فرمایا اللہ اس بارے میں فیصلہ دے گا توسورہ نساء کی آیت نازل ہوئی جس میں یہ حکم ہے۔:
'' اللہ تعالیٰ نے تمہاری اولاد کے بارے میں یہ حکم دیا ہے کہ ایک مذکر کا حصہ دومونث کے برابر ہوگا ''
تو نبی کریم (صلی اللہ علیہ وآلہ وسلم) نے مجھ سے یہ فرمایا اس عورت کو میرے پاس بلا کر لاؤ اور اس کے دوسرے فریق کو بھی لاؤ، پھر نبی کریم نے ان بچیوں کے وصی سے یہ کہا کہ تم ان بچیوں کو دوتہائی حصہ دو اور ان کی والدہ کو آٹھواں حصہ دو جو باقی بچ جائے وہ تمہیں ملے گا۔