Sunan Al Daraqutni: Hadith 4495

4495 ۔ زید بن اسلم اپنے والد کا یہ بیان نقل کرتے ہیں : حضرت عمربن خطاب (رض) نے اپنے غلام کو عامل مقرر کیا ‘ اسے چراگاہ کا نگران بنایا ‘ اس کا نام ” ہنی “ تھا ‘ حضرت عمر (رض) نے اس سے کہا : اے ہنی ! تم مسلمانوں کے ساتھ نرمی کا برتاؤ کرنا ‘ مظلوم کی بددعا سے بچنا ‘ کیونکہ وہ مستجاب ہوتی ہے ‘ تم تھوڑی سی بھیڑ ‘ بکریوں کے مالک کو چراگاہ میں داخل ہونے دینا ‘ البتہ عثمان بن عفان اور عبدالرحمن بن عوف کے جانوروں کو اندرنہ آنے دینا۔ اس کی وجہ یہ ہے کہ ان دونوں کے جانور اگر مر بھی گئے تو یہ لوگ اپنے کھجوروں کے باغات کی طرف چلے جائیں گے ‘ لیکن تھوڑی سی بکریوں کے مالکان کے جانورگر مرگئے تو وہ اپنے بچوں کو لے کر میرے پاس آجائیں گے اور کہیں گے : اے امیرالمومنین ! (ہماری مدد کیجئے ! ) کیا میں انھیں ترک کردوں گا ؟ ان لوگوں کو پانی اور پارہ فراہم کرنا میرے نزدیک دینار اور درہم فراہم کرنے سے زیادہ آسان کام ہے۔ اللہ کی قسم ! یہ لوگ یہ سمجھتے ہیں کہ ہم نے ان کے ساتھ زیادتی کی ہے حالانکہ یہ ان ہی کا علاقہ ہے ‘ جس کے بارے میں زمانہ جاہلیت میں وہ لوگ ایک دوسرے کے ساتھ جنگ کیا کرتے تھے۔
اور اسی علاقے میں رہتے ہوئے انھوں نے اسلام قبول کیا ہے ‘ اس ذات کی قسم ! جس کی قدرت میں میری جان ہے ! میں نے اگر اللہ کی راہ میں مجاہد ین کو مال فراہم نہ کرنا ہو ‘ تو میں ایک بالشت کے برابر جگہ لوگوں کے داخلے سے نہ روکتا (یعنی اسے سرکاری چراگاہ قرارنہ دیتا) ۔