Sunan Al Daraqutni: Hadith 4499

4499 ۔ سیدہ ام سلمہ (رض) بیان کرتی ہیں کہ ایک مرتبہ میں نبی اکرم (صلی اللہ علیہ وآلہ وسلم) کے پاس بیٹھی ہوئی تھی ‘ دو آدمی آپ کی خدمت میں حاضر ہوئے ‘ ان دونوں کے درمیان وراثت سے متعلق جھگڑاچل رہا تھا جو کچھ ایسی چیزوں کے بارے میں تھا جو پرانی ہوچکی تھیں ‘ نبی اکرم (صلی اللہ علیہ وآلہ وسلم) نے ارشاد فرمایا : میں تم لوگوں کے درمیان اپنی رائے سے فیصلہ دوں گا جس بارے میں مجھ پر وحی نازل نہیں ہوئی تو جس شخص کے حق میں ‘ میں فیصلہ دے دوں اور ظلم کے طورپرا سے وہ چیزمل جائے تو اسے جہنم کا ٹکڑاملے گا ‘ جسے وہ قیامت کے دن اپنی گردن میں ڈال کرلے کر آئے گا۔ راوی کہتے ہیں کہ وہ دونوں افراد رونے لگے۔ ان میں سے ایک نے کہا : حق جس کا میں مطالبہ کررہا تھا ‘ اصل میں وہ میرے ساتھی کا حق ہے ‘ نبی اکرم (صلی اللہ علیہ وآلہ وسلم) نے فرمایا : نہیں ! تم دونوں جاؤ اور اس کی جانچ پڑتال کرکے اس کے حصے کو لو۔ پھر تم دونوں سے ہر ایک اپنی ساتھی کے لیے اسے حلال قراردیدے۔