Sunan Al Daraqutni: Hadith 469

حضرت انس بن مالک (رض) بیان کرتے ہیں : ” عرینہ “ قبیلے کے کچھ لوگ نبی اکرم (صلی اللہ علیہ وآلہ وسلم) کی خدمت میں مدینہ منورہ حاضر ہوئے، وہاں کی آب وہوا انھیں موافق نہیں آئی تو نبی اکرم (صلی اللہ علیہ وآلہ وسلم) نے ان سے فرمایا : اگر تم لوگ چاہو تو صدقے کے اونٹوں کی طرف چلے جاؤ اور وہاں ان کا دودھ اور پیشاب پیو، انھوں نے ایسا ہی کیا تو وہ تندرست ہوگئے ، پھر وہ لوگ ان اونٹوں کے چرواہے کے پاس گئے اور اسے قتل کردیا اور نبی اکرم (صلی اللہ علیہ وآلہ وسلم) کے اونٹوں کو اپنے ساتھ ہانک کرلے گئے اور اسلام کو چھوڑ کر مرتد ہوگئے۔ نبی اکرم (صلی اللہ علیہ وآلہ وسلم) نے ان کے پیچھے لوگوں کو بھیجا۔ انھیں پکڑ کر لایا گیا تو نبی اکرم (صلی اللہ علیہ وآلہ وسلم) نے ان کے ہاتھ اور پاؤں کٹوادیئے اور ان کی آنکھوں میں سلائیاں پھروادیں اور پھر انھیں پتھریلی زمین پر ڈال دیا گیا، یہاں تک کہ وہ اسی حالت میں مرگئے۔