1122 ۔ حضرت علی (رض) بیان کرتے ہیں : نبی کریم (صلی اللہ علیہ وآلہ وسلم) جب نماز کا آغاز کرتے تھے توتکبیر کہنے کے بعد یہ دعا پڑھتے تھے :
'' میں نے اپنا رخ اس ذات کی طرف کرلیا جس نے آسمان و زمین کو ٹھیک طور پر پیدا کیا ہے اور میں مشرک نہیں ہوں میری نماز میری قربانی، میری زندگی ، میری موت اللہ کے لیے ہے ، جو تمام جہانوں کا پروردگار ہے جس کا کوئی شریک نہیں ہے مجھے اسی بات کا حکم دیا گیا ہے اور میں سب سے پہلامسلمان ہوں، اے اللہ ! تو بادشاہ ہے ، تیرے علاوہ اور کوئی معبود نہیں ہے تو میرا پروردگار ہے میں تیرا بندہ ہوں میں نے اپنے اوپرظلم کیا ہے ، میں اپنے گناہ کا اعتراف کرتا ہوں تو میرے تمام گناہوں کو بخش دے، گناہوں کو تیرے علاوہ کوئی بخش نہیں سکتا، میں حاضر ہوں، تیری بارگاہ میں بھلائی اور سعادت سب تیرے دست قدرت میں ہے ، اور برائی تیری طرف نہیں آسکتی، ہے میں تیری مدد سے سب کچھ کرسکتا ہوں، تیری طرف رجوع کرتا ہوں، تیری ذات برکت والی ہے ، تو بلند و برتر ہے میں تجھ سے مغفرت طلب کرتا ہوں اور تیری بارگاہ میں توبہ کرتا ہوں۔ ''
نبی کریم (صلی اللہ علیہ وآلہ وسلم) جب رکوع میں جاتے تھے تو آپ یہ پڑھتے تھے :
اے اللہ ! میں نے تیرے لیے رکوع کیا ، میں تجھ پر ایمان لایا، میں تیرے سامنے جھک گیا، میری سماعت، میری بصارت، میرا مغز ، میری ہڈیاں ، میرے پٹھے (تیری بارگاہ میں جھک گئے) ۔
نبی کریم (صلی اللہ علیہ وآلہ وسلم) جب رکوع سے سر اٹھاتے تو یہ دعا پڑھتے تھے :
'' جس شخص نے اللہ کی حمد بیان کی ، اللہ نے اس کی حمد کو سن لیا، اے ہمارے پروردگار ہر طرح کی حمد تیرے لیے مخصوص ہے ، جو اتنی ہو جو آسمان و زمین کو بھر دے اور ان کے درمیان موجود جگہ کو بھردے اور اس کے علاوہ جو توچا ہے اس حصے کو بھی بھردے۔ ''
نبی کریم (صلی اللہ علیہ وآلہ وسلم) جب سجدے میں جاتے تو یہ پڑھتے تھے :
'' اے اللہ میں نے تیری بارگاہ میں سجدہ کیا میں تجھ پر ایمان لایاتیرے لیے اسلام قبول کیا، میرا سر اس ذات کے لیے جھکا ہوا ہے جس نے اسے پیدا کیا ہے ، اسے صورت دی ہے اور اچھی صورت دی ہے ، اسے سماعت اور بصارت سے نوازا ہے اللہ کی ذات برکت والی ہے جو سب سے بہترین خالق ہے۔ ''
نبی کریم (صلی اللہ علیہ وآلہ وسلم) جب نماز پڑھنے کے بعد سلام پھیرتے تو یہ دعا پڑھتے تھے :
اے اللہ : جو میں پہلے کر چکاہوں جو بعد میں کروں گاجوخفیہ طور پر کروں گا جو اعلانیہ طور پر کیا، جو اسراف کیا، جس کے بارے میں تو مجھ سے زیادہ جانتا ہے ، تو ان سب کے بارے میں میری مغفرت کردے تو آگے کرنے والے ہے تو پیچھے کرنے والا ہے ، تیرے علاوہ کوئی اور معبود نہیں۔ ''
امام دارقطنی بیان کرتے ہیں : نضر بن شمیل کے حوالے سے یہ بات پتہ چلی ہے جو علم لغت کے ماہرین میں سے ہیں وہ فرماتے ہیں : نبی کریم (صلی اللہ علیہ وآلہ وسلم) کے یہ الفاظ ، برائی تیری طرف نہیں جاسکتی، اس سے مراد یہ ہے برائی ایسی چیز نہیں ہے جس کے ذریعے تیرا قرب حاصل کیا جائے۔