1174 ۔ حضرت ابوہریریرہ (رض) نبی کریم (صلی اللہ علیہ وآلہ وسلم) کا یہ فرمان نقل کرتے ہیں جو شخص نماز پڑھتے ہوئے سورة فاتحہ نہیں پڑھتا وہ نماز مکمل نہیں ہوتی پوری نہیں ہوتی۔
راوی بیان کرتے ہیں : میں نے کہا اے حضرت ابوہریرہ ! بعض اوقات میں امام کی اقتداء میں ہوتا ہوں انھوں نے میری پنڈلی پر (کوئی چیز) چبھوتے ہوئے فرمایا پھر تم دل میں اسے پڑھ لو، کیونکہ میں نے نبی کریم (صلی اللہ علیہ وآلہ وسلم) کو یہ بات ارشاد فرماتے ہوئے سنا ہے :
'' اللہ تعالیٰ فرماتا ہے : میں نے نماز (میں قرات) کو اپنے اور اپنے بندوں کے درمیان دو حصوں میں تقسیم کردیا ہے اس کا نصف حصہ اس کے لیے ہے میرا بندہ نماز کے آغاز میں بسم اللہ الرحمن الرحیم پڑھتا ہے تو میرا بندہ میرا ذکر کرتا ہے پھر وہ کہتا ہے ، الحمدللہ رب العالمین، تو میں کہتاہوں میرے بندے نے میری حمد بیان کی ہے پھر وہ کہتا ہے الرحمن ، تو میں کہتاہوں میرے بندے نے میری تعریف کی پھر وہ کہتا ہے مالک، تو میں کہتاہوں میرے بندے نے میری بزرگی بیان کی پھر وہ کہتا ہے ، ایاک نعبد وایاک نستعین، تو یہ آیت میرے اور میرے بندے کے درمیان دو حصوں میں تقسیم ہوگی، سورت کا آخری حصہ میرے بندہ کے لیے ہے اور میرے بندے نے جو مانگا ہے وہ اسے ملے گا۔
ابن سمعان نامی راوی، عبداللہ بن سمعان ہے اور یہ شخص متروک الحدیث ہے۔
ثقہ راویوں کی ایک جماعت نے اس حدیث کو علاء بن عبدالرحمن کے حوالے سے نقل کیا ہے ۔
ان راویوں میں امام مالک بن انس ، شیخ ابن جریج، شیخ روح بن قاسم، شیخ ابن عیینہ ، ابن عجلان، حسن بن حر، ابواویس اور دیگر حضرات شامل ہیں۔ ان حضرات نے اس روایت کی سند میں اختلاف نقل کیا ہے تاہم متن پر ان کا اتفاق ہے ان میں سے کسی ایک نے بھی اپنی روایت میں بسم اللہ الرحمن الرحیم کے الفاظ نقل نہیں کیے۔
تو ان تمام حضرات کا متفقہ طور پر ابن سمعان کی نقل کردہ روایت کے خلاف نقل کرنا درست سمجھا جائے گا، باقی اللہ تعالیٰ بہتر جانتا ہے۔