1263 ۔ قیس بن ابوحازم بیان کرتے ہیں : میں نے حضرت عبداللہ بن عباس کی اقتداء میں بصرہ میں نماز ادا کی ، انھوں نے پہلی رکعت میں سورة فاتحہ پڑھی اور سورة بقرہ کی پہلی آیت پڑھی، پھر وہ دوسری رکعت کے لیے کھڑے ہوئے تو انھوں نے سورة فاتحہ پڑھی اور سورة بقرہ کی دوسری آیت پڑھی، پھر وہ رکوع میں چلے گئے جب وہ نماز پڑھ کر فارغ ہوئے تو انھوں نے ہماری طرف رخ کرکے ارشاد فرمایا : اللہ تعالیٰ نے یہ بات ارشاد فرمائی ہے :
'' تم اس میں سے جو آسانی سے پڑھ سکو اس کی تلاوت کرلو ''
اس روایت کی سند حسن ہے۔ اس میں ان لوگوں کے لیے دلیل موجود ہے جو اس بات کے قائل ہیں : اللہ کے اس فرمان تم اس میں سے جو آسانی سے پڑھا جاسکتا ہے پڑھ لو، سے مراد تلاوت ہے جو سو رہ فاتحہ پڑھنے کی بعد کی جاتی ہے باقی اللہ بہترجانتا ہے۔