1319 ۔ قاسم نامی راوی بیان کرتے ہیں : علقمہ نے میرا ہاتھ تھاما اور بتایا : ایک مرتبہ حضرت عبداللہ بن مسعود (رض) نے میرا ہاتھ تھام کر یہ بتایا تھا : ایک مرتبہ نبی کریم (صلی اللہ علیہ وآلہ وسلم) نے میرا ہاتھ تھاما اور مجھے تشہد کے کلمات کی تعلیم دی (وہ کلمات یہ ہیں):
'' تمام قولی اور بدنی عبادتیں اللہ کے لیے مخصوص ہیں اے نبی ! آپ پر سلام ہو اور اللہ کی رحمتیں اور برکتیں نازل ہوں اور ہم پرا اور اللہ کے تمام نیک بندوں پر سلام ہو، میں اس بات کی گواہی دیتاہوں کہ اللہ کے علاوہ کوئی معبود نہیں ہے اور میں اس بات کی گواہی دیتاہوں کہ حضرت محمد (صلی اللہ علیہ وآلہ وسلم) اس کے بندے اور رسول ہیں۔ ''
حضرت عبداللہ بن مسعود فرماتے ہیں : جب تم یہ پڑھ لو گے تو تم نے اپنے اوپرلازم نماز کو ادا کردیا اب اگر تم اٹھنا چاہو تواٹھ جاؤ اگر بیٹھے رہناچاہو تو بیٹھے رہو۔ یہاں پر اس روایت کے راوی شبابہ ثقہ ہیں انھوں نے روایت کے آخر میں الگ سے یہ بات ذکر کی ہے یہ کلمات حضرت عبداللہ بن مسعود کا کلام ہیں اور یہ روایت اس روایت کے مقابلے میں زیادہ مستند ہے جس میں ان کلمات کو نبی کے الفاظ کے ساتھ ملادیا گیا ہے باقی اللہ بہترجانتا ہے ۔
بعض دیگرراویوں نے بھی اسے اسی طرح حضرت عبداللہ کے کلام کے طور پر نقل کیا ہے انھوں نے (اضافی کلمات کو) مرفوع حدیث کے طور پر نقل نہیں کیا ۔