1440 ۔ نافع بیان کرتے ہیں : حضرت عبداللہ بن عمر (رض) مکہ تشریف لائے انھیں ان کی اہلیہ صفیہ بنت ابوعبید کی بیماری کی اطلاع ملی تو حضرت عبداللہ بن عمر (رض) نے سفر تیز کردیا جب سورج غروب ہوگیا تو ان کے ساتھیوں میں سے کسی صاحب نے کہا : نماز کا وقت ہوچکا ہے لیکن حضرت عبداللہ خاموش رہے ان کے جس ساتھی نے انھیں نماز کے لیے کہا تھا اس نے یہ سوچا کہ ضرور ان کے پاس اس بارے میں کوئی ایسی معلومات ہوں گی جس سے میں واقف نہیں ہوں، پھر حضرت عبداللہ بن عم (رض) چلتے رہے یہاں تک کہ جب شفق غروب ہوئی تو انھوں نے پڑاؤ کیا اور نماز کے لیے اقامت کہی وہ سفر کے دوران نماز کے لیے اذان نہیں دیا کرتے تھے۔
یہاں پر نیشاپوری راوی نے ایک لفظ مختلف نقل کیا ہے ، اس کے بعد کے الفاظ راویوں کے متفقہ ہیں وہ بیان کرتے ہیں : حضرت عبداللہ (رض) کھڑے ہوئے اور انھوں نے مغرب اور عشاء کی نماز ایک ساتھ ادا کی، پھر انھوں نے یہ بات بتائی جب نبی کریم (صلی اللہ علیہ وآلہ وسلم) نے تیزی سے سفر کرنا ہوتا تو آپ (صلی اللہ علیہ وآلہ وسلم) شفق غروب ہوجانے کے تھوڑی دیر بعد مغرب اور عشاء کی نماز ایک ساتھ ادا کیا کرتے تھے آپ (صلی اللہ علیہ وآلہ وسلم) سفر کے دوران اپنی سواری کی پشت پر ہی نماز ادا کرلیا کرتے تھے خواہ سوری کا رخ کسی بھی سمت ہو۔
حضرت عبداللہ بن عمر (رض) نے ان لوگوں کو بتایا : نبی کریم (صلی اللہ علیہ وآلہ وسلم) اسی طرح کیا کرتے تھے۔