عیسیٰ بن ابوعیسیٰ بیان کرتے ہیں : میں نے امام شعبی (رح) سے یہ کہا : مجھے حضرت ابوہریرہ (رض) کے قول، اور نافع کی حضرت عبداللہ بن عمر (رض) کے حوالے سے نقل کردہ روایت ، پر بڑی حیرت ہوتی ہے۔ امام شعبی (رح) نے دریافت کیا : ان دنوں حضرات نے کیا بات بیان کی ہے ؟ تو میں نے جواب دیا : حضرت ابوہریرہ (رض) تو یہ فرماتے ہیں : (قضائے حاجت کے وقت) قبلہ کی طرف رخ یا پیٹھ نہ کرو، جبکہ نافع نے حضرت عبداللہ بن عمر (رض) کے حوالے سے یہ بات نقل کی ہے، وہ فرماتے ہیں : میں نے نبی اکرم (صلی اللہ علیہ وآلہ وسلم) کو دیکھا : آپ قضائے حاجت کے لیے بیت الخلاء تشریف لے گئے، جس کا رخ قبلہ کی طرف تھا۔
تو امام شعبی (رح) نے یہ بات ارشاد فرمائی : جہاں تک حضرت ابوہریرہ (رض) کے قول کا تعلق ہے، تو وہ صحرا کے بارے میں ہے، کیونکہ اللہ تعالیٰ کے کچھ بندے ایسے ہیں جو صحرا میں نماز ادا کرتے ہیں، تو تم لوگوں کو استنجاء کرتے ہوئے ان کی طرف رخ یا پیٹھ نہیں کرنی چاہیے، لیکن جہاں تک گھروں میں بنائے جانے والے بیت الخلاء کا تعلق ہے، تو ان میں قبلہ کی طرف رخ یا پیٹھ کرنے کی کوئی ممانعت نہیں ہے۔