1687 ابوقلابہ کہتے ہیں میری ملاقات حضرت عمرو سے ہوئی ‘ تو انھوں نے مجھے یہ حدیث سنائی ہم لوگ ایسی جگہ رہتے تھے جہاں پانی موجود تھا اور وہ لوگوں کی گزرگاہ تھی ‘ ہمارے وہاں سے سوار گزرا کرتے تھے تو ہم ان سے اس بارے میں سوال کرتے تھے اور لوگوں کے رویے کے بارے میں پوچھا کرتے تھے تو وہ بتاتے تھے کہ ایک صاحب ہیں جو یہ کہتے ہیں ‘ وہ نبی ہیں اور اللہ تعالیٰ نے انھیں مبعوث کیا ہے اور اللہ تعالیٰ نے ان کی طرف یہ یہ کلام وحی کیا ہے۔ حضرت عمرو (رض) بیان کرتے ہیں میں وہ کلام یاد کرتا رہا اور وہ میرے سینے میں پختہ ہوتارہا ‘ عام عربوں نے اسلام قبول کرنے کو فتح مکہ کے ساتھ معلق کردیا ‘ وہ یہ کہتے تھے کہ ان نبی اور ان کی قوم کا جائزہ لو اگر یہ اپنی قوم پر غالب آگئے تو یہ سچے نبی ہوں گے ‘ جب فتح مکہ کی اطلاع ہمیں ملی توہرقوم نے اسلام قبول کرنے میں جلدی کی ‘ میرے والد بھی اسلام قبول کرنے کے لیے اپنے قبیلے کے ساتھ تھے ‘ وہ نبی اکرم (صلی اللہ علیہ وآلہ وسلم) کی خدمت میں حاضر ہوئے ‘ کچھ عرصہ نبی اکرم (صلی اللہ علیہ وآلہ وسلم) کے پاس مقیم رہے ‘ جب نبی اکرم (صلی اللہ علیہ وآلہ وسلم) کی خدمت سے واپس آئے تو ہم ان سے ملنے کے لیے گئے ‘ جب انھوں نے ہمیں دیکھا توبولے اللہ کی قسم ! میں تمہارے پاس اللہ کے سچے رسول کی طرف سے آرہاہوں ‘ انھوں نے تمہیں اس بات کا حکم دیا ہے ‘ انھوں نے ارشاد فرمایا ہے تم نے اس طرح اس وقت میں نماز ادا کرنی ہے ‘ اس طرح اس وقت میں نماز ادا کرنی ہے ‘ اس طرح اس وقت میں نماز ادا کرنی ہے ‘ جب نماز کا وقت ہوجائے تو تم میں سے کوئی ایک شخص اذان دے اور جس کو سب سے زیادہ قرآن آتا ہو وہ تمہاری امامت کرے ‘ جب لوگوں نے ہمارے قبیلے میں تحقیق کی تو کسی بھی شخص کو مجھ سے زیادہ قرآن نہیں آتا تھا تو ان لوگوں نے مجھے آگے کھڑا کردیا ‘ میری عمر اس وقت ٦ سال یا ٧ سال تھی ‘ میری ایک چادر تھی جو چھوٹی تھی ‘ میں سجدے میں جاتا تھا تو وہ ہٹ جاتی تھی تو قبیلے کی ایک خاتون نے کہا آپ لوگ اپنے قاری کے پیچھے والے حصے کو ڈھانپتے کیوں نہیں ہیں ؟ پھر قبیلے والوں نے مجھے ایک قمیض سلواکردی جو بحرین کے کپڑے کی بنی ہوئی تھی، اس قمیض کے ملنے پر مجھے جتنی خوشی ہوئی ‘ اتنی کسی اور بات پر نہیں ہوئی تھی۔