طلحہ بن نافع بیان کرتے ہیں : حضرت ابوایوب انصاری، حضرت جابر بن عبداللہ انصاری اور حضرت انس بن مالک انصاری (رض) نے نبی اکرم (صلی اللہ علیہ وآلہ وسلم) کے حوالے سے اس آیت کے بارے میں یہ بات نقل کی ہے۔ (آیت یہ ہے :)” اس میں وہ لوگ ہیں جو اس بات کو پسند کرتے ہیں : وہ اچھی طرح پاکیزگی حاصل کریں اور اللہ تعالیٰ اچھی طرح پاکیزگی حاصل کرنے والوں سے محبت کرتا ہے “۔
نبی اکرم (صلی اللہ علیہ وآلہ وسلم) نے ارشاد فرمایا : اے انصار کے گروہ ! اللہ تعالیٰ نے طہارت حاصل کرنے کے حوالے سے تمہاری بہت تعریف کی ہے، تمہارا طہارت حاصل کرنے کا طریقہ کیا ہے ؟ انھوں نے عرض کیا : یارسول اللہ ! ہم نماز کے لیے وضو کرتے ہیں جنابت کی حالت میں غسل کرلیتے ہیں۔ نبی اکرم (صلی اللہ علیہ وآلہ وسلم) نے ارشاد فرمایا : کیا اس کے علاوہ تمہارا کوئی اور بھی طریقہ ہے ؟ انھوں نے عرض کی : نہیں ! البتہ جب ہم میں سے کوئی شخص پاخانہ کرتا ہے، تو وہ اس بات کو پسند کرتا ہے، وہ پانی کے ذریعے استنجاء کرے۔ تو نبی اکرم (صلی اللہ علیہ وآلہ وسلم) نے فرمایا : اس کی وجہ یہی ہوگی، تم اسے اختیار کیے رکھنا۔ اس روایت کا راوی عتبہ بن ابو حکیم مستند نہیں ہے۔