1756 صالح بن خوات اس صحابی کا بیان نقل کرتے ہیں جنہوں نے نبی اکرم (صلی اللہ علیہ وآلہ وسلم) کی اقتداء میں غزوہ ذات الرقاع میں نماز خوف ادا کی تھی۔ (وہ صحابی بیان کرتے ہیں) نبی اکرم (صلی اللہ علیہ وآلہ وسلم) کے ساتھ ایک گروہ نے صف قائم کی اور دوسرا گروہ دشمن کے مقابلے میں رہا۔ نبی اکرم (صلی اللہ علیہ وآلہ وسلم) نے اپنے ساتھ والے گروہ کو ایک رکعت پڑھائی۔ پھر وہ لوگ خود کھڑے ہوئے اور انھوں نے بقیہ نماز خودادا کرلی۔ پھر وہ لوگ چلے گئے اور دشمن کے مقابلے میں صف بنالی۔ پھر دوسرا گروہ آیا نبی اکرم (صلی اللہ علیہ وآلہ وسلم) نے اپنی نماز کی باقی رہ جانے والی رکعت انھیں پڑھائی، پھر آپ بیٹھے رہے اور اس گروہ نے اپنی نماز مکمل کی۔ پھر نبی اکرم (صلی اللہ علیہ وآلہ وسلم) نے ان سب سمیت سلام پھیردیا۔
ابن مہدی کہتے ہیں امام مالک (رح) نے اس روایت کے مطابق فتوی دیا ہے۔
ابن وہب کہتے ہیں امام مالک (رح) نے پہلے مجھ سے کہا مجھے یہ روایت سب سے زیادہ پسند ہے۔ لیکن انھوں نے پھر اس موقف سے رجوع کرلیا اور بولے میرے نزدیک سب سے پسندیدہ یہ ہے کہ وہ لوگ سلام پھیرنے کے بعد اپنی نماز مکمل کریں۔