1764 سیدہ عائشہ صدیقہ (رض) بیان کرتی ہیں نبی اکرم (صلی اللہ علیہ وآلہ وسلم) کی حیات مبارکہ میں ایک مرتبہ سورج گرہن ہوگیا ‘ نبی اکرم (صلی اللہ علیہ وآلہ وسلم) مسجد تشریف لے گئے ‘ آپ (صلی اللہ علیہ وآلہ وسلم) کھڑے ہوئے ‘ آپ (صلی اللہ علیہ وآلہ وسلم) نے تکبیر کہی ‘ لوگوں نے آپ کے پیچھے صف قائم کرلی ‘ نبی اکرم (صلی اللہ علیہ وآلہ وسلم) نے طویل قرأت کی ‘ پھر آپ تکبیر کہتے ہوئے رکوع میں چلے گئے اور آپ نے طویل رکوع کیا ‘ پھر آپ نے رکوع سے سر اٹھایا اور سمع اللہ لمن حمدہ ربنا ولک الحمد پڑھا اور پھر آپ نے کھڑے ہو کرقرأت کرنا شروع کی ‘ لیکن یہ پہلے والی قرأت سے کم تھی ‘ پھر اس کے بعد آپ (صلی اللہ علیہ وآلہ وسلم) نے تکبیر کہتے ہوئے طویل رکوع کیا ‘ لیکن یہ پہلے والے رکوع سے کم تھا ‘ پھر اس کے بعد آپ (صلی اللہ علیہ وآلہ وسلم) نے سمع اللہ لمن حمدہ ربنا ولک الحمد پڑھا ‘ پھر آپ (صلی اللہ علیہ وآلہ وسلم) نے دوسری رکعت میں بھی اسی طرح کیا اور آپ نے ان دو رکعت میں چار مرتبہ رکوع کیا اور چار مرتبہ سجدہ کیا ‘ آپ (صلی اللہ علیہ وآلہ وسلم) کی نماز ختم کرنے سے پہلے سورج روشن ہوچکا تھا۔