2147 حضرت ابوہریرہ (رض) بیان کرتے ہیں نبی اکرم (صلی اللہ علیہ وآلہ وسلم) نے یہ بات ارشاد فرمائی ہے ‘(راوی کو شک ہے ‘ شاید یہ الفاظ ہیں ) حضرت ابوالقاسم (صلی اللہ علیہ وآلہ وسلم) نے یہ بات ارشاد فرمائی ہے ” اسے (پہلی کے چاند کو) دیکھ کر روزے رکھنے شروع کرو اور اسے دیکھ کر ہی روزے رکھنے ختم کرو اور اگر بادل چھائے ہوئے ہوں توتیس کی تعدادپوری کرو۔
امام دار قطنی بیان کرتے ہیں یعنی شعبان کے تیس دن کی تعداد پوری کرلو۔ یہ روایت شعبہ سے منقول ہونے کے حوالے سے مستند ہے۔ امام بخاری نے اس روایت کو آدم کے حوالے سے شعبہ سے نقل کیا ہے اور اس میں یہ الفاظ ہیں ” تم شعبان کے مہینے کی تیس دن کی تعداد پوری کرلو “۔ اس روایت میں لفظ ” یعنی “ نقل نہیں کیا گیا ہے۔