2192 حضرت عبداللہ بن قیس فرماتے ہیں میں نے نبی اکرم (صلی اللہ علیہ وآلہ وسلم) کی زوجہ محترمہ سیدہ عائشہ صدیقہ (رض) کو یہ فرماتے ہوئے سنا ہے ایک مرتبہ تیسویں تاریخ کو نبی اکرم (صلی اللہ علیہ وآلہ وسلم) نے روزے کی حالت میں صبح کی ‘ آپ نے دن میں ہی شوال کا چاند دیکھ لیا ‘ تو آپ نے شام میں افطار ی نہیں کی۔
حضرت سالم اپنے والد (حضرت عبداللہ بن عمر (رض)) کے بارے میں یہ بات نقل کرتے ہیں ایک مرتبہ انھوں نے دن کے وقت شوال کا چاند دیکھ لیا ‘ تو حضرت عبداللہ بن عمر (رض) نے فرمایا تمہارے لیے اس وقت تک افطاری کرنا حلال نہیں ہے جب تک تم پہلی کا چاند اس وقت تک نہیں دیکھ لیتے جب اسے دیکھاجاتا ہے (یعنی رات کے وقت) ۔
معاذبن محمد بیان کرتے ہیں میں نے زہری سے شوال کے چاند کے بارے میں دریافت کیا ‘ جب اسے صبح کے وقت دیکھا لیا جائے ‘ تو انھوں نے فرمایا میں نے سعید بن مسیب کو فرماتے ہوئے سنا ہے اگر شوال کا چاند صبح صادق ہوجانے کے بعد عصرتک (راوی کو شک ہے شاید یہ الفاظ ہیں مغرب تک) طلوع ہوجائے تو اس رات کا چاند شمار ہوگا جو آگے آئے گی۔
امام ابوعبداللہ فرماتے ہیں اس بات پر سب کا اتفاق ہے۔