2368 حضرت ابوہریرہ (رض) بیان کرتے ہیں ایک شخص نبی اکرم (صلی اللہ علیہ وآلہ وسلم) کی خدمت میں حاضرہوا ‘ اس نے آپ کو بتایا گیا کہ اس نے رمضان میں (روزے کے دوران) اپنی بیوی کے ساتھ صحبت کرلی ہے ‘ تو نبی اکرم (صلی اللہ علیہ وآلہ وسلم) نے ارشاد فرمایا تم ایک غلام آزاد کرو ‘ اس نے عرض کی یارسول اللہ ! میرے پاس وہ نہیں ہے ‘ نبی اکرم (صلی اللہ علیہ وآلہ وسلم) نے فرمایا تم مسلسل دو ماہ روزے رکھو ‘ اس نے کہا میں اس کی استطاعت نہیں رکھتا ‘ نبی اکرم (صلی اللہ علیہ وآلہ وسلم) نے فرمایا تم ساٹھ مسکینوں کو کھانا کھلاؤ ‘ اس نے عرض کی میں اس کی بھی طاقت نہیں رکھتا۔ راوی بیان کرتے ہیں پھر نبی اکرم (صلی اللہ علیہ وآلہ وسلم) کی خدمت میں ایک برتن لایا گیا جس میں پندرہ صاع کھجوریں تھیں ‘ نبی اکرم (صلی اللہ علیہ وآلہ وسلم) نے فرمایا اسے لو اور اسے صدقہ کردو ‘ اس نے عرض کی کیا اپنے اور گھروالوں سے زیادہ ضرورت مندکوکروں ‘ مجھے اپنے اور اپنے گھروالوں سے زیادہ کوئی ضرورت مند نہیں آپ نے فرمایا اسے تم کھالو اور تمہارے گھروالے کھالیں اور تم ایک دن روزہ رکھ لو اور اللہ تعالیٰ سے مغفرت طلب کرو۔