2406 محمد بن حذیفہ بیان کرتے ہیں ہم لوگ حضرت عدی بن حاتم (رض) کی حدیث ایک دوسرے کو سنایا کرتے تھے ‘ وہ کوفہ کی ایک کنارے والی آبادی میں رہا کرتے تھے ‘ میں نے یہ سوچا کہ اگر میں ان کے پاس جاؤں اور اگر میں خودان سے یہ حدیث سن لوں تو یہ مناسب ہوگا ‘ تو میں ان کی خدمت میں حاضرہوا ‘ میں نے کہا آپ کے حوالے سے ایک حدیث مجھ تک پہنچی ہے ‘ میں یہ چاہتا ہوں کہ وہ آپ سے سن لوں۔ توراوی بیان کرتے ہیں حضرت عدی نے فرمایا جب نبی اکرم (صلی اللہ علیہ وآلہ وسلم) کو مبعوث کیا گیا ‘ تو میں فرار ہو کر اسلامی سلطنت کے دوردراز کے حصے میں چلا گیا ‘ پھر میں نے یہ سوچا کہ مجھے ان صاحب کی خدمت میں حاضر ہونا چاہیے ‘ اگر وہ سچے ہوں گے تو میں ان کی بات مان لوں گا ‘ جب میں (آپ کی خدمت میں) آیاتولوگ میرے لیے کھڑے ہوئے۔
راوی بیان کرتے ہیں (اس کے بعد انھوں نے مجھے پوری حدیث سنائی ‘ جس میں یہ بیان ہے ) نبی اکرم (صلی اللہ علیہ وآلہ وسلم) نے مجھ سے فرمایا تم حیرہ گئے ہو ؟ میں نے عرض کی نہیں ! لیکن مجھے اس کی جگہ کا پتہ ہے ‘ نبی اکرم (صلی اللہ علیہ وآلہ وسلم) نے ارشاد فرمایا عنقریب وہ وقت آئے گا جب کوئی عورت وہاں سے کسی کی پناہ میں آئے بغیر نکلے گی ‘ یہاں تک کہ (مکہ پہنچ کر) خانہ کعبہ کا طواف کرے گی۔
حضرت عدی (رض) بیان کرتے ہیں پھر میں نے ایک عورت کو دیکھا جو حیرہ سے روانہ ہوئی اور اس نے (مکہ پہنچ گئی) خانہ کعبہ کا طواف کیا۔ یہ روایت مختصر ہے۔