2478 حضرت عبداللہ بن عمر (رض) بیان کرتے ہیں، نبی اکرم (صلی اللہ علیہ وآلہ وسلم) نے پہلے حضرت عتاب بن اسید (رض) کو امیرالحج مقرر کیا تو انھوں نے حج افراد کیا۔ پھر ٩ ہجری میں آپ نے حضرت ابوبکر (رض) کو امیرالحج مقرر کیا تو انھوں نے بھی حج افراد کیا۔ ١٠ ہجری میں نبی اکرم (صلی اللہ علیہ وآلہ وسلم) نے خود حج کیا تو آپ نے بھی حج افراد کیا۔ آپ کے بعد حضرت ابوبکر (رض) خلیفہ بنے تو انھوں نے حضرت عمر (رض) کو (امیرالحج بناکر) بھیجا تو انھوں نے بھی حج افراد کیا۔ پھر حضرت ابوبکر (رض) نے خود حج کیا تو انھوں نے بھی حج افراد کیا۔ پھر حضرت ابوبکر (رض) کا انتقال ہوگیا تو ان کے بعدحضرت عمر (رض) خلیفہ بنے ‘ انھوں نے حضرت عبدالرحمن بن عوف (رض) (امیرالحج بناکر) بھیجا تو انھوں نے بھی حج افراد کیا۔ پھر اس کے بعد حضرت عمر (رض) نے کئی مرتبہ حج کیا اور ہمیشہ حج افراد کیا۔ پھر حضرت عمر (رض) کا انتقال ہوگیا اور حضرت عثمان (رض) خلیفہ بنے تو انھوں نے بھی حج افراد کیا۔ پھر حضرت عثمان (رض) کو محصور کردیا گیا تو حضرت عبداللہ بن عباس (رض) نے حج میں لوگوں کی قیادت کا فریضہ سرانجام دیا۔ انھوں نے بھی حج افراد کیا۔