2533 حضرت عبداللہ بن عمروبن العاص (رض) بیان کرتے ہیں قربانی کے دن نبی اکرم (صلی اللہ علیہ وآلہ وسلم) اپنی سواری پر ٹھہرگئے ‘ لوگوں نے آپ (صلی اللہ علیہ وآلہ وسلم) سے سوالات کرنا شروع کیے ‘ ان میں سے کسی نے عرض کی یارسول اللہ ! مجھے یہ پتہ نہیں تھا ‘ قربانی سے پہلے کنکریاں مارنی ہیں ‘ میں نے کنکریاں مارنے سے پہلے ہی قربانی کرلی ہے ‘ نبی اکرم (صلی اللہ علیہ وآلہ وسلم) نے ارشاد فرمایا تم اب کنکریاں مارلو کوئی حرج نہیں ہے ‘ دوسرے شخص نے عرض کیا یارسول اللہ ! مجھے پتہ نہیں تھا ‘ قربانی سرمنڈوانے سے پہلے ہوگی ‘ میں نے قربانی کرنے سے پہلے ہی سرمنڈوالیا ہے ‘ نبی اکرم (صلی اللہ علیہ وآلہ وسلم) نے ارشاد فرمایا اب قربانی کرلو ‘ کوئی حرج نہیں ہے۔ (راوی بیان کرتے ہیں ) اس دن میں نے آپ (صلی اللہ علیہ وآلہ وسلم) کوسنا کہ آپ (صلی اللہ علیہ وآلہ وسلم) سے جس بھی کسی معاملے سے متعلق سوال کیا گیا ‘ جسے کوئی شخص بھول گیا تھا یاجس سے وہ واقف نہیں تھا ‘ یعنی اس نے کوئی کام کسی دوسرے کام سے پہلے کرلیا ‘ یا اس طرح کا کوئی عمل پہلے کرلیا ‘ نبی اکرم (صلی اللہ علیہ وآلہ وسلم) نے اس سے یہی فرمایا تم اب کرلو ‘ کوئی حرج نہیں ہے۔