2599 ابونصربیان کرتے ہیں میری حضرت علی (رض) سے ملاقات ہوئی ‘ میں نے حج کا احرام باندھ لیا تھا جبکہ انھوں نے حج اور عمرہ کا ایک ساتھ احرام باندھا تھا۔ میں نے دریافت کیا کیا میں ایسا کرسکتا ہوں جیسا آپ نے کرلیا ہے ‘ انھوں نے فرمایا ایسا ہوسکتا ہے ‘ اگر تم پہلے عمرہ کرلوتو ‘ میں نے دریافت کیا میں اگر اس کا ارادہ کروں تو مجھے کیا کرنا ہوگا ؟ انھوں نے فرمایا تم پانی کا ایک برتن لے کر اپنے اوپر بہاؤ اور پھر ان دونوں کا ایک ساتھ احرام باندھ لو ‘ پھر ان دونوں کے لیے دو مرتبہ طواف کرنا اور ایک مرتبہ سعی کرنا اور قربانی کے دن سے پہلے تمہارے لیے احرام کھولنا جائز نہیں ہوگا۔
منصور نامی راوی بیان کرتے ہیں میں نے اس روایت کا تذکرہ مجاہد سے کیا ‘ تو انھوں نے فرمایا ہم تو یہی فتوی دیتے ہیں ایک مرتبہ طواف کیا جائے گا لیکن اب ہم ایسا نہیں کریں گے۔
امام شافعی یہ فرماتے ہیں میں افراد کو اختیار کرتا ہوں اور تمتع کرنا بہتر ہے ‘ ہم اسے مکروہ قرار نہیں دیتے۔