2671 ۔ یحییٰ بن یعمر بیان کرتے ہیں میں نے حضرت عبداللہ بن عمر (رض) سے کہا اے ابوعبدالرحمن کچھ لوگ یہ کہتے ہیں کہ تقدیر کی کوئی حقیقت نہیں ہے ، حضرت عبداللہ بن عمر (رض) نے دریافت کیا کیا ان میں سے کوئی شخص ہمارے پاس بھی موجود ہے ، میں نے جواب دیا جی نہیں ! تو حضرت عبداللہ بن عمر (رض) نے فرمایا اگر تمہاری ان سے ملاقات ہو تومیرایہ پیغام پہنچا دینا کہ عبداللہ بن عمر اللہ کی بارگاہ میں تم سے لاتعلق ہونے کی گزارش کرتا ہے اور تمہارا اس سے کوئی واسطہ نہیں ہے۔
(پھر حضرت عبداللہ بن عمر (رض) نے ) یہ حدیث بیان کی میں نے حضرت عمر بن خطاب کو یہ بیان کرتے ہوئے سنا ہے وہ فرماتے ہیں کہ ایک دن ہم نبی کریم (صلی اللہ علیہ وآلہ وسلم) کے پاس کچھ لوگوں کی موجودگی میں بیٹھے ہوئے تھے اس دوران ایک شخص وہاں آیا اس پر سفر کی کوئی علامت نہیں تھی اور وہ شہر کا رہنے والابھی نہ تھا، وہ لوگوں کے بیچ سے گزرتا ہوا نبی کریم (صلی اللہ علیہ وآلہ وسلم) کے سامنے آکر بیٹھ گیا بالکل اسی طرح جس طرح ہم میں سے کوئی شخص نماز کے دوران بیٹھتا ہے۔ پھر اس نے اپنا ہاتھ نبی کریم (صلی اللہ علیہ وآلہ وسلم) کے زانوؤں پر رکھا اور عرض کی اے حضرت محمد اسلام کیا ہے ؟ نبی کریم (صلی اللہ علیہ وآلہ وسلم) نے ارشاد فرمایا اسلام یہ ہے کہ تم اس بات کی گواہی دو کہ اللہ کے علاوہ اور کوئی معبود نہیں ہے ، اور حضرت محمد (صلی اللہ علیہ وآلہ وسلم) اللہ کے رسول ہیں اور نماز قائم کرو اور زکوۃ ادا کرو اور تم حج کرو اور تم عمرہ کرو اور تم غسل جنابت کرو اور تم وضو مکمل کرو اور تم رمضان کے روزے رکھو اس نے دریافت کیا اگر میں ایسا کروں تو کیا میں مسلمان ہوجاؤں گا ؟ نبی کریم (صلی اللہ علیہ وآلہ وسلم) نے فرمایا جی ہاں وہ بولا آپ نے ٹھیک فرمایا ہے ۔
اس کے بعد انھوں نے باقی حدیث بیان کی اس حدیث کے آخر میں ہے نبی کریم (صلی اللہ علیہ وآلہ وسلم) نے ارشاد فرمایا اس شخص کو میرے پاس بلاکرلاؤ (راوی کہتے ہیں) ہم اس کی تلاش میں نکلے لیکن ہم اسے نہیں پاسکے، نبی کریم (صلی اللہ علیہ وآلہ وسلم) نے دریافت کیا کیا تم جانتے ہو یہ کون شخص تھا، یہ جبرائیل تھے جو تمہارے پاس آئے تھے تاکہ تمہیں تمہاری دین کی تعلیم دیں تو تم اسے حاصل کرلو اس ذات کی قسم جس کے دست قدرت میں میری جان ہے یہ جب سے میرے پاس آرہے ہیں آج پہلی مرتبہ مجھے انھیں پہچاننے میں دقت ہوئی اور میں نے انھیں اس وقت پہچانا جب یہ چلے گئے۔
اس حدیث کی سند ثابت ہے اور صحیح ہے ، امام مسلم نے اسے اسی سند کے ساتھ نقل کیا ہے۔