عبد خیر نامی راوی نے حضرت علی (رض) کے بارے میں یہ بات نقل کی ہے : ” انھوں نے وضو کرتے ہوئے اپنے دونوں ہاتھ پہلے دھوئے، پھر تین مرتبہ کلی کی اور ناک میں پانی ڈالا، پھر چہرے کو تین مرتبہ دھویا، دونوں بازؤ وں کو تین مرتبہ دھویا، پھر اپنے سر کا تین مرتبہ مسح کیا اور پھر دونوں پاؤں تین مرتبہ دھو لیے اور پھر یہ ارشاد فرمایا : جو شخص یہ پسند کرتا ہو کہ وہ نبی اکرم (صلی اللہ علیہ وآلہ وسلم) کے وضو کا طریقہ دیکھ لے، تو وہ اس طریقے کو دیکھ لے۔
شعیب نامی راوی نے یہ الفاظ نقل کیے ہیں : (حضرت علی (رض) نے فرمایا :) میں نے نبی اکرم (صلی اللہ علیہ وآلہ وسلم) کو اسی طرح وضو کرتے ہوئے دیکھا ہے۔
ابو حنیفہ (رح) نامی راوی نے اس روایت کو خالد نامی راوی کے حوالے سے نقل کیا ہے، اس میں یہ الفاظ نقل کیے ہیں : حضرت علی (رض) نے اپنے سر کا تین مرتبہ مسح کیا تھا، جبکہ محدثین کی ایک جماعت نے بھی اس روایت کو دیگر حوالوں سے نقل کیا ہے اور اس میں سر کا مسح ایک مرتبہ کرنے کا ذکر ہے۔
ان دیگر محدثین میں سے صرف حجاج نامی راوی کو ایک مقام پر وہم ہوا ہے، انھوں نے عبد خیر نامی راوی کی جگہ عمرو ذامر نامی راوی کا ذکر کیا ہے۔ ہمارے علم کے مطابق امام ابوحنیفہ (رح) کے علاوہ اور کسی بھی راوی نے سر کا مسح تین مرتبہ کرنے کا ذکر نہیں کیا ہے۔ امام ابوحنیفہ (رح) نے اپنی روایت میں دیگر راویوں سے مختلف بات نقل کی ہے، جبکہ دوسری طرف مسح کے حکم کے بارے میں بھی ان کی اپنی رائے مختلف ہے۔ اس روایت سے ، جسے انھوں نے حضرت علی (رض) کے حوالے سے نبی اکرم (صلی اللہ علیہ وآلہ وسلم) سے نقل کیا ہے، کیونکہ امام ابوحنیفہ (رح) بھی یہ بات بیان کرتے ہیں : وضو میں سر کا مسح ایک مرتبہ کرنا سنت ہے۔ اس بات کو ابراہیم بن ابو یحییٰ اور قاضی ابو یوسف نے اپنی سند کے ہمراہ حضرت علی (رض) سے نقل کیا ہے۔