2931 ۔ حضرت نعمان (رض) بیان کرتے ہیں کہ ان کی والدہ نے ان کے والد حضرت بشیر سے کہا کہ وہ اپنے صاحب زادے نعمان کو کھجوروں کا ایک باغ دے دیں، تو حضرت بشیر نے ایسا کرلیا، پھر انھوں نے دریافت کیا کہ میں اس بارے میں کسے گواہ بناؤں ؟ تو اس خاتون نے کہا نبی کریم (صلی اللہ علیہ وآلہ وسلم) کو تو حضرت نعمان کے والد نبی کریم (صلی اللہ علیہ وآلہ وسلم) کی خدمت میں حاضر ہوئے اور آپ کے سامنے اس بات کا تذکرہ کیا تو نبی کریم (صلی اللہ علیہ وآلہ وسلم) نے فرمایا کیا تمہاری اس کے علاوہ اور اولاد بھی ہے ؟ انھوں نے عرض کی جی ہاں ! نبی کریم نے فرمایا کیا تم نے جس طرح سے اسے دیا ہے اسی طرح باقی سب کو بھی دیا ہے ؟ انھوں نے عرض کی جی نہیں ! تو نبی کریم نے ارشاد فرمایا میرے جیساشخص اس طرح کی چیز کا گواہ نہیں بن سکتا ، اللہ تعالیٰ اس بات کو پسند کرتا ہے کہ تم اپنی اولاد کے بارے میں انصاف سے کام لو، جس طرح وہ اس بات کو بھی پسند کرتا ہے کہ تم لوگ آپس میں انصاف سے کام لو۔