2944 ۔ حضرت طارق بن عبداللہ محاربی (رض) بیان کرتے ہیں کہ میں نے نبی کریم (صلی اللہ علیہ وآلہ وسلم) کی دو مرتبہ زیارت کی ہے ایک مرتبہ میں نے آپ کو ذوالمجاز کے بازار میں دیکھا ہے میں اپنے سامان کے ساتھ وہاں موجود تھا جو میں نے فروخت کرنے کے لیے وہاں رکھا ہوا تھا، اسی طرح نبی کریم (صلی اللہ علیہ وآلہ وسلم) وہاں سے گزرے تو آپ نے سرخ حلہ زیب تن کیا ہوا تھا۔ اور آپ بلند آواز میں یہ ارشاد فرما رہے تھے ، اے لوگو ! لاالہ الا اللہ پڑھ لو توفلاح پاجاؤ گے ایک شخص پتھر پکڑ کر آپ کے پیچھے جارہا تھا، جس نے آپ کو شدید زخمی کردیا تھا۔ وہ شخص یہ کہتا جارہا تھا، اے لوگو ان کی بات نہ مانو کیونکہ یہ جھوٹ بولتے ہیں تو میں نے پوچھایہ کون صاحب ہیں ؟ تو لوگوں نے بتایا یہ عبدالمطلب کی اولاد سے تعلق رکھنے والے ایک نوجوان ہیں ، میں نے دریافت کیا یہ ان کے پیچھے جانے والاشخص جوا نہیں پتھر ماررہا تھا یہ کون ہے ؟ لوگوں نے بتایا کہ یہ ان کا چچا عبدالعزی ہے۔ (راوی کہتے ہیں ) یہ ابوالہب تھا۔
پھر جب اسلام غالب ہوگیا اور نبی کریم مدینہ منورہ تشریف لے آئے توہم ربدہ سے اور ربدہ کے جنوبی علاقوں سے کچھ سواروں کے ہمراہ آئے اور مدینہ منورہ کے قریب ہم نے پڑاؤ کیا۔ ہمارے ساتھ ایک خاتون بھی تھیں۔ راوی کہتے ہیں ایک مرتبہ ہم بیٹھے ہوئے تھے کہ اسی دوران ایک صاحب ہمارے پاس تشریف لائے جنہوں نے دوسفید کپڑے پہن رکھے تھے ، انھوں نے سلام کیا، ہم نے انھیں جواب دیا، انھوں نے دریافت کیا آپ لوگ کہاں سے آئے ہو ؟ ہم نے جواب دیا ربدہ سے اور ربذہ کے جنوبی علاقوں سے ۔ راوی کہتے ہیں کہ ہمارے ساتھ سرخ اونٹ بھی تھے۔ انھوں نے دریافت کیا کیا تم اپنے اونٹ فروخت کرو گے ؟ تو ہم نے جواب دیا جی ہاں۔ انھوں نے دریافت کیا، کتنے کے عوض میں ؟ ہم نے کہا کھجوروں کے اتنے اتنے صاع کے عوض میں ، تو انھوں نے ہمیں کوئی کمی کرنے کے لیے نہیں کہا۔ پھر انھوں نے اونٹ کے سر کو پکڑا اور مدینے کے اندر چلے گئے اور ہماری نگاہوں سے اوجھل ہوگئے توہم لوگ ایک دوسرے کو ملامت کرنے لگے کہ ہم نے کہا کہ تم لوگوں نے اپنااونٹ ایک ایسے شخص کودے دیا جس سے تم واقف ہی نہیں ہو تو وہ عورت (جو ہمارے ساتھ تھی) وہ بولی تم ایک دوسرے کو ملامت نہ کرو میں نے ان صاحب کے چہرے میں ایک ایسی چیز دیکھی ہے (جس سے یہ ثابت ہوتا ہے ) کہ یہ تمہیں رسوائی کا شکار نہیں کریں گے میں نے کسی بھی شخص کا چہرہ ایسا نہیں دیکھا جوان سے زیادہ چودھویں کے چاند سے مشابہت رکھتا ہو۔ پھر جب عشاء کا وقت ہوا تو ایک شخص ہمارے پاس آیا اور بولاالسلام علیکم ، میں اللہ کے رسول کا قاصد ہوں جو تمہارے پاس آیا ہوں، انھوں نے تمہیں یہ ہدایت کی ہے کہ تم ان کھجوروں کو سیر ہو کرکھالو اور پوری طرح سے ماپ بھی لو۔ راوی کہتے ہیں ہم نے انھیں سیر ہو کرکھایا اور پھر پوری طرح ماپ لیا۔ اگلے دن ہم مدینہ شہر میں داخل ہوئے تو نبی کریم منبر پر کھڑے ہو کرلوگوں کو خطبہ دے رہے تھے آپ ارشاد فرما رہے تھے
دینے والا ہاتھ اوپروالا ہوتا ہے اور تم اس شخص پر خرچ کا آغاز کرو جو تمہارے زیر کفالت ہو، تمہاری والدہ ، تمہارے والد تمہاری بہن، تمہارا بھائی اور تمہارے درجہ بدرجہ قریبی عزیز۔ تو ایک انصاری کھڑا ہوا اور اس نے عرض کی یارسول اللہ یہ بنوثعلبہ جنہوں نے زمانہ جاہلیت میں فلاں شخص کو قتل کیا تھا، آپ ہمیں ان سے بدلہ دلوادیے تو نبی نے اپنے دونوں ہاتھ بلند کیے یہاں تک کہ ہم نے آپ کی بغلوں کی سفیدی کو دیکھ لیا۔ آپ نے ارشاد فرمایا، باپ اپنی اولاد کی طرف سے تاوان ادا نہیں کرے گا۔