2991 ۔ عبداللہ بن رباح بیان کرتے ہیں ہم ایک وفد کی شکل میں حضرت معاویہ (رض) کے پاس گئے ہمارے ساتھ حضرت ابوہریرہ (رض) بھی تھے ہم میں سے کوئی ایک شخص کھاناتیار کرتا تھا پھر اپنے ساتھیوں کی دعوت کرتا تھا ایک دن ایک شخص یہ کام کرتا دوسرے دن دوسرا کرلیتا جب میری باری آئی میں نے کہا اے ابوہریرہ (رض) آپ نے نبی کریم (صلی اللہ علیہ وآلہ وسلم) کے حوالے سے کوئی حدیث سنانی ہے جب تک کھانا نہیں آتا۔ تو حضرت ابوہریرہ (رض) نے بتایا فتح مکہ کے موقع پر نبی کریم (صلی اللہ علیہ وآلہ وسلم) کے ساتھ تھا لشکر کے دائیں طرف والے اور بائیں طرف والے دونوں حصوں میں ایک کا امیر نبی کریم (صلی اللہ علیہ وآلہ وسلم) نے خالد بن ولید کو مقرر کیا اور حضرت زبیر (رض) کو دوسرے حصے کا مقرر کیا لشکر کے پیچھے والے حصے کا امیر حضرت ابوعبیدہ (رض) کو بنایا جو وادی کے نشیبی حصے میں تھا۔ پھر نبی کریم (صلی اللہ علیہ وآلہ وسلم) نے مجھ سے فرمایا اے ابوہریرہ انصار کو میرے پاس بلاؤ ، حضرت ابوہریرہ (رض) بیان کرتے ہیں میں نے انھیں بلایا تو وہ تیزی سے چلتے ہوئے آئے نبی کریم (صلی اللہ علیہ وآلہ وسلم) نے فرمایا اے انصار ! یہ قریش کے اوباش لوگ کل جب تمہارے سامنے آئیں تو تم انھیں پیس دینا ہے ، ہماری تمہاری ملاقات صفا (پہاڑی) پر ہوگی۔
راوی بیان کرتے ہیں انھوں نے اپنے ہاتھ کے ذریعہ اشارہ کیا، اگلے دن جس شخص نے مقابلے کے لیے آنے کی کوشش کی انھوں نے اسے مارد یا۔ نبی کریم (صلی اللہ علیہ وآلہ وسلم) کو فتح نصیب ہوئی آپ (صلی اللہ علیہ وآلہ وسلم) صفا (پہاڑی) پر تشریف لائے اور اس پر کھڑے ہوئے ۔ ابوسفیان آپ کی خدمت میں حاضر ہوا اس نے عرض کی یارسول اللہ ! اگر قریش کو اسی طرح مارا جاتارہا تو آج کے بعد قریش (کا نام ونشان) نہیں رہے گا۔ تو نبی کریم (صلی اللہ علیہ وآلہ وسلم) نے ارشاد فرمایا جو شخص ابوسفیان کے گھر میں داخل ہوجائے گا اسے امان ہے جو شخص اپنے گھر کا دروازہ بند کرے گا اسے امان ہے جو شخص اپنا ہتھیار ڈال دے گا اسے بھی امان ہے ۔
حضرت ابوہریرہ (رض) بیان کرتے ہیں کچھ انصار نے یہ کہا اب ان صاحب کے دل میں اپنی قوم کی محبت اجاگر ہوگئی ہے ، اور اپنی بستی سے لگاؤ پیدا ہوگیا ہے تو نبی کریم (صلی اللہ علیہ وآلہ وسلم) پر اس بارے میں وحی نازل کی کئی ، آپ نے ارشاد فرمایا اے انصار تم نے یہ کہا ہے ، اب ان صاحب کے دل میں قوم کی محبت اجاگر ہوگئی ہے اور اپنی بستی سے لگاؤ پیدا ہوگیا ہے یاد رکھنا ! میں اللہ کا بندہ اور اس کا رسول ہوں ، میں نے اللہ کی طرف اور تمہاری طرف ہجرت کی، میری زندگی اور میری موت تمہارے ساتھ ہے راوی بیان کرتے ہیں انھوں نے عرض کی یارسول اللہ ہم نے اللہ اور اس کی رسول کی محبت میں یہ بات کہی ہے تو نبی کریم (صلی اللہ علیہ وآلہ وسلم) نے ارشاد فرمایا اللہ اور اس کا رسول تمہاری تصدیق کرتے ہیں اور تمہاری معذرت قبول کرتے ہیں۔