3114 ۔ مالک اشتر بیان کرتے ہیں : میں حضرت علی (رض) کی خدمت میں حاضرہوا میں نے کہا : اے امیرالمومنین ! جب ہم آپ کے پاس سے اٹھ کرگئے تو ہم نے کچھ باتیں سنی ہیں ، کیا نبی کریم (صلی اللہ علیہ وآلہ وسلم) نے قرآن کے علاوہ کوئی اور چیز بطور خاص آپ کو دی ؟ تو حضرت علی (رض) نے فرمایا : نہیں صرف یہ صحیفہ ہے جو میری تلوار کے دستے میں ہے ، پھر حضرت علی (رض) نے کنیز کو بلایا تو وہ اس صحیفے کو لے کر آئی (اس میں یہ تحریر تھا : نبی کریم (صلی اللہ علیہ وآلہ وسلم) نے ) ارشاد فرمایا ہے :
'' بیشک حضرت ابراہیم (علیہ السلام) نے مکہ کو حرم قرار دیا تھا، اور میں مدینہ کو حرم قرار دیتاہوں ، دونوں طرف کی سنگلاح زمین کے درمیان موجود (مدینہ منورہ) حرم ہے۔ یہاں کے کانٹے کو توڑا نہیں جاسکتا، یہاں کے شکار کو بھگایا نہیں جاسکتا، جو شخص یہاں کوئی بدعت ایجاد کرے یا کسی بدعتی کو پناہ دے تو اس پر اللہ اس کے فرشتوں اور تمام لوگوں کی لعنت ہوگی۔ دوسروں کے مقابلے میں تمام اہل ایمان ایک ہاتھ کی مانند ہیں ان کے خون یکساں اہمیت کے حامل ہیں ان کے کسی عام فرد کی دی ہوئی پناہ کو تسلیم کیا جائے گا اور کسی مسلمان کو کسی کافر کے بدلہ میں قتل نہیں کیا جاسکتا۔
ابوحجیفہ نے حضرت علی (رض) کے حوالے سے اسی کی مانند نقل کیا ہے ، اس کے الفاظ کچھ مختلف ہیں تاہم مفہوم ایک ہی ہے۔