3145 ۔ بنوحارثہ کے آزاد کردہ غلام بشیر بن یسار جو ایک بزرگ اور سمجھدار آدمی تھے اور انھوں نے اپنے (آقا کے ) خاندان بنوحارثہ سے تعلق رکھنے والے کچھ صحابہ کرام کی زیارت بھی کی ہوئی تھی ، جن میں حضرت رافع بن خدیج (رض) ، حضرت سہل بن ابوحثمہ (رض) اور حضرت سوید بن نعمان (رض) شامل ہیں بشیر بن یسار ان حضرات کے حوالے سے یہ بات بیان کرتے ہیں : قسامت کا حکم بنوحارثہ کے بارے میں آیا تھا، انصار کے ایک فرد حضرت عبداللہ بن سہل (رض) خیبر میں قتل کردیے گئے۔
بشیر نے یہ بات ذکر کی : حضرت عبدالہ بن سہل (رض) اور حضرت محیصہ بن مسعود (رض) کا تعلق بنوحارثہ سے تھا، یہ دونوں حضرات نبی کریم (صلی اللہ علیہ وآلہ وسلم) کے زمانہ اقدس میں خیبر میں تشریف لے گئے ، ان دنوں (مسلمانوں اور یہودیوں کے درمیان) صلح چل رہی تھی ، خیبر میں یہودی ہی رہتے تھے ، خیبر میں حضرت عبداللہ (رض) اور حضرت محیصہ (رض) اپنے اپنے کام کے سلسلے میں ایک دوسرے سے جدا ہوگئے (اس کے بعد انھوں نے حسب سابق حدیث نقل کی ہے ) تاہم اس میں یہ الفاظ ہیں : ہم کفار کی قوم کی قسموں کو کی سے قبول کرسکتے ہیں ؟۔