3147 ۔ عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں : حضرت محیصہ بن مسعود (رض) ، حضرت حویصہ بن مسعود (رض) ، حضرت عبدالرحمن (رض) (بن سہل) اور حضرت عبداللہ سہل (رض) خیبر گئے وہاں یہ حضرات اپنے کام کے سلسلے میں ایک دوسرے سے جدا ہوگئے پھر انھیں حضرت عبداللہ بن سہل (رض) مقتول ملے یہ حضرات واپس نبی کریم (صلی اللہ علیہ وآلہ وسلم) کی خدمت میں حاضر ہوئے اور آپ (صلی اللہ علیہ وآلہ وسلم) کو اس بارے میں بتایا تو نبی کریم (صلی اللہ علیہ وآلہ وسلم) نے ان سے فرمایا تم پچاس افراد قسامت کے طور پر قسم اٹھا کر اپنے قاتل (کو سزا) دے سکتے ہو، تو ان حضرات کو یہ گوارا نہیں ہوا، انھوں نے عرض کی ، یارسول اللہ، ہم غیب کے بارے میں کیسے قسم اٹھاسکتے ہیں ، ہم ایک ایسے معاملے کے بارے میں قسم اٹھائیں جس میں ہم موجود نہیں تھے، تو نبی کریم (صلی اللہ علیہ وآلہ وسلم) نے فرمایا، پھر یہودیوں کے پچاس افراد قسم اٹھا کر بری الذمہ ہوجائیں گے ۔ ان حضرات نے عرض کی یارسول اللہ کیا ہم کفار کی قسموں کو قبول کرلیں ؟ (راوی بیان کرتے ہیں ) پھر نبی کریم (صلی اللہ علیہ وآلہ وسلم) کی خدمت میں زکوۃ کا مال آیا تو نبی کریم (صلی اللہ علیہ وآلہ وسلم) نے خود (اس مقتول) کی دیت ادا کی۔