3280 ۔ عبداللہ بن عبدالرحمن بن ازہر، اپنے والد کا یہ بیان نقل کرتے ہیں : نبی کریم (صلی اللہ علیہ وآلہ وسلم) کی خدمت میں ایک شخص کو لایا گیا جس نے شراب پی تھی ، نبی کریم (صلی اللہ علیہ وآلہ وسلم) اس وقت حنین میں موجود تھے آپ نے اس کے چہرے پر مٹی پھینکی اور اپنے ساتھیوں کو حکم دیا کہ وہ اپنے جوتوں اور ہاتھ میں جو چیز بھی ہے اس ک ذریعہ اس شخص کی پٹائی کریں یہاں تک کہ (کچھ دیر کے بعد) نبی کریم (صلی اللہ علیہ وآلہ وسلم) نے انھیں فرمایا : اب بس کرو، تو وہ لوگ رک گئے۔
نبی کریم (صلی اللہ علیہ وآلہ وسلم) کے وصال تک (شرابی کو سزا دینے کا) یہی طریقہ رہا اس کے بعد حضرت ابوبکر (رض) نے شراب پینے کی سزا میں چالیس کوڑے لگوائے ، حضرت عمر (رض) نے اپنے عہد خلافت کے ابتدائی حصہ میں چالیس کوڑے لگوائے اور آخری حصہ میں اسی کوڑے لگواناشروع کردیے ، پھر حضرت عثمان نے (اپنے عہد خلافت میں) دونوں طرح کی سزا دی، لیکن حضرت معاویہ (رض) نے (اپنے عہد خلافت میں) اسی کوڑوں کو برقرار رکھا۔