3298 ۔ حضرت ابن عباس (رض) بیان کرتے ہیں : نبی کریم (صلی اللہ علیہ وآلہ وسلم) کے زمانہ اقدس میں شراب پینے والوں کو ہاتھوں اور جوتوں اور لاٹھیوں کے ذریعہ ماراجاتا تھا، یہاں تک کہ آپ (صلی اللہ علیہ وآلہ وسلم) کا وصال ہوگیا، پھر حضرت ابوبکر (رض) کے زمانہ میں نبی کریم (صلی اللہ علیہ وآلہ وسلم) کے عہد مبارک سے زیادہ تعداد میں شراب پینے کے مقدمات پیش ہوئے تو حضرت ابوبکر (رض) نے ان لوگوں کو چالیس کوڑے لگوائے جب ان کا انتقال ہوگیا تو حضرت عمر (رض) نے بھی شراب پینے والوں کو چالیس کوڑے لگوائے یہاں تک کہ حضرت عمر (رض) کے سامنے مہاجرین اولین سے تعلق رکھنے والے ایک صاحب کو لایا گیا جنہوں نے شراب پی تھی، انھیں کوڑے مارنے کا حکم دیا گیا تو وہ بولے آپ مجھے کیسے کوڑے مارسکتے ہیں جب کہ آپ کے اور میرے درمیان اللہ کی کتاب کا حکم موجود ہے ، حضرت عمر نے دریافت کیا آپٌ کو اللہ کی کتاب کا حکم وہ کہاں سے ملا ہے کہ میں آپ کو کوڑے نہ ماروں ؟ تو انھوں نے کہا اللہ نے اپنی کتاب میں یہ ارشاد فرمایا ہے :
'' جو لوگ ایمان لائے اور انھوں نے نیک اعمال کیے ان پر اس چیز کے حوالے سے کوئی گناہ نہیں ہوگا جو انھوں نے کھایا پیا۔ ''
(وہ صاحب بولے) میں ان لوگوں میں شامل ہوں جو ایمان لائے انھوں نے نیک اعمال کیے پرہیزگاری اختیار کی اور مومن ہوئے پھر پرہیزگار ہوئے اور انھوں نے اچھائی کی (جس کا ذکر قرآن میں ہے) ۔
میں نبی کریم (صلی اللہ علیہ وآلہ وسلم) کے ساتھ غزوہ بدر، غزوہ احد، غزوہ خندق اور دیگرتمام غزوات میں شری کر ہاہوں تو حضرت عمر (رض) نے دوسرے لوگوں سے فرمایا تم لوگ اس کا جواب کیوں نہیں دیتے ہو جو اس نے کہا ہے تو حضرت ابن عباس (رض) نے کہا، یہ آیت گزرے ہوئے لوگوں کے عذر کے طور پر منافقین کے خلاف حجت کے طور پر نازل ہوئی تھیں۔ کیونکہ اللہ تعالیٰ نے ارشاد فرمایا ہے : اے ایمان والو بیشک شراب اور جوا۔۔۔ الخ۔ حضرت ابن عباس نے ان دونوں آیتوں کو مکمل پڑھا اور بولے اگر یہ ان لوگوں میں سے ہوں جو ایمان لائے اور انھوں نے نیک اعمال کیے تو اللہ نے تو انھیں شراب پینے سے منع کیا ہے حضرت عمر (رض) نے فرمایا تم نے ٹھیک کہا ہے (پھر دوسرے لوگوں سے دریافت کیا) آپ لوگوں کی اس بارے میں کیا رائے ہے ، (میں اسے کیا سزا دوں) تو حضرت علی (رض) نے فرمایا جو شخص شراب پیے وہ مدہوش ہوجاتا ہے جب مدہوش ہوجاتا ہے تو ہذیان بکتا ہے اور جب ہذیان بکتا ہے تو زنا کا جھوٹا الزام لگاتا ہے اور زنا کا جھوٹا الزام لگانے والے کو اسی کوڑے مارے جاتے ہیں تو حضرت عمر (رض) کے حکم کے تحت ان صاحب کو اسی کوڑے لگائے گئے۔