3307 ۔ حضرت ابن عباس (رض) بیان کرتے ہیں : ایک مرتبہ نبی کریم (صلی اللہ علیہ وآلہ وسلم) لوگوں کو جمعہ کے دن خطبہ دے رہے تھے ، بنولیث بن بکر سے تعلق رکھنے والے ایک شخص وہاں آیا اور لوگوں کی گردنیں پھلانگتا ہوا نبی کریم (صلی اللہ علیہ وآلہ وسلم) کے قریب پہنچ گیا اس نے عرض کی یارسول اللہ مجھ پر حد جاری کریں نبی کریم (صلی اللہ علیہ وآلہ وسلم) نے اس سے فرمایا تم بیٹھ جاؤ، آپ نے اسے ڈانٹا تو وہ بیٹھ گیا، وہ پھر کھڑا ہوا اس نے عرض کی یارسول اللہ مجھ پر حد جاری کریں تو نبی کریم (صلی اللہ علیہ وآلہ وسلم) نے فرمایا تم بیٹھ جاؤ وہ بیٹھ گیا، پھر وہ تیسری مرتبہ کھڑا ہوا اس نے عرض کی یارسول اللہ مجھ پر حد جاری کردو نبی کریم (صلی اللہ علیہ وآلہ وسلم) نے فرمایا تم نے کون سے قابل حد (جرم کا ارتکاب کیا ہے) اس نے عرض کی میں نے ایک عورت کے ساتھ حرام صحبت کی ہے نبی کریم نے اپنے ساتھیوں سے جن میں حضرت علی حضرت عباس حضرت زید بن حارثہ اور حضرت عثمان (رض) بھی تھے فرمایا اسے لے جاکرکوڑے لگاؤ۔ بنولیث سے تعلق رکھنے والا وہ شخص شادی شدہ نہیں تھا، عرض کی گئی یارسول اللہ آپ اس عورت کو کوڑے کیوں نہیں لگواتے جسکے ساتھ اس نے گناہ کیا ہے تو نبی کریم نے ارشاد فرمایا اسے کوڑے لگاؤ پھر میر ےپ اس لے کر آؤ۔ جب اسے نبی کریم (صلی اللہ علیہ وآلہ وسلم) کے پاس لایا گیا تو نبی کریم (صلی اللہ علیہ وآلہ وسلم) نے اس سے دریافت کیا تمہاری ساتھی عورت کون ہے ؟ اس نے جواب دیا، فلاں عورت اس نے بنوبکر سے تعلق رکھنے والی ایک عورت کا نام لیا، نبی کریم نے اس عورت کو بلوایا اور اس سے اس بارے میں دریافت کیا وہ بولی اس نے جھوٹ کہا ہے اللہ کی قسم میں تو اسے جانتی بھی نہیں ہوں، اور اس نے جو الزام لگایا ہے میں اس سے بری ہوں۔ اور میں جو کہہ رہی ہوں اس پر اللہ تعالیٰ گواہ ہے۔ نبی کریم نے اس شخص سے دریافت کیا، اس بارے میں تمہارے پاس کیا ثبوت ہے کہ تم نے اس عورت کے ساتھ گناہ کیا ہے ، کیونکہ یہ عورت تو اس بات کی انکاری ہے ، کہ تم نے اس کے ساتھ کوئی گناہ کیا ہے۔ اگر تمہارے پاس کوئی ثبوت ہے تو میں اس عورت کو کوڑے لگواؤں گا، اور اگر تمہارے پاس کوئی ثبوت نہیں ہے تو میں زنا کا جھوٹا الزام لگانے کی سزا کے طور پر کوڑے لگواؤں گا۔ اس شخص نے کہا یارسول اللہ میرے پاس کوئی ثبوت نہیں ہے ، تو نبی کریم کے حکم کے تحت اسے زنا کا جھوٹا الزام لگانے کی حد اسی کورے لگوائے گئے۔