3420 ۔ حصین بن منذر بیان کرتے ہیں : میں حضرت عثمان غنی (رض) کے پاس موجود تھا ان کے سامنے ولید بن عقبہ کو لایا گیا حمران نے اور ایک دوسرے شخص نے ولید کے خلوف گواہی دی ان میں سے ایک نے کہا، اس نے ولید کو شراب پیتے ہوئے دیکھا ہے اور دوسرے نے یہ کہا : اس نے ولید کو (شراب پینے کے بعد) قے کرتے ہوئے دیکھا ہے تو حضرت عثمان (رض) نے فرمایا یہ قے اسی وقت کرے گا جب اس نے شراب پی رکھی ہوگی، حضرت عثمان (رض) نے حضرت علی (رض) سے کہا : آپ اس پر حد جاری کردیں حضرت علی (رض) نے حضرت حسن (رض) سے فرمایا تم اس پر حد جاری کرو، تو حضرت حسن (رض) نے فرمایا، یہ کام وہ کرے جس کی یہ ذمہ داری ہے ، انھوں نے عبداللہ بن جعفر سے کہا، تم اس پر حد جاری کرو، عبداللہ بن جعفر نے کوڑا پکڑا اور اسے کوڑے مارنے لگے، حضرت علی (رض) گنتی کرتے رہے جب چالیس کوڑے ہوگئے تو حضرت علی (رض) نے فرمایا : اب رک جاؤ، کیونکہ نبی کریم نے (شراب پینے والے کو) چالیس کوڑے لگوائے تھے۔
عبدالعزیز نامی راوی نے اپنی روایت میں یہ الفاظ نقل کیے ہیں : حضرت ابوبکر (رض) نے اور حضرت عمر (رض) نے اسی کوڑے لگوائے تھے ان میں سے ہر ایک سنت ہے (یعنی قابل عمل ہے ) البتہ میں اسے (چالیس کوڑوں کی سزا کو) پسند کرتا ہوں۔