3441 ۔ حجیہ بن عدی بیان کرتے ہیں : حضرت علی (رض) نے ان لوگوں کے ہاتھ جوڑوں سے کٹوادیے تھے اور (خون کا بہاؤ روکنے کے لیے ) ان پر داغ لگوائے تھے ان لوگوں کے ہاتھوں کا منظر گویا آج بھی میری نگاہ میں ہے وہ گویا گدھوں کے عضو مخصوص کی طرح تھے۔
شعبی بیان کرتے ہیں : حضرت علی (رض) پاؤں کٹوا دیتے تھے لیکن ایڑی چھوڑ دیتے تھے تاکہ آدمی اس کا سہارا لے سکے۔ حضرت ابن عباس (رض) بیان کرتے ہیں : میں حضرت عمر (رض) کے بارے میں یہ گواہی دیتاہوں کہ انھوں نے چور کے ہاتھ اور پاؤں کٹوادیے تھے۔
عبدالرحمن بن قاسم اپنے والد کا یہ بیان نقل کرتے ہیں : حضرت ابوبکر (رض) نے (چور کا دوسرا) پاؤں کاٹنے کا ارادہ کیا (اس چور کا) ایک ہاتھ اور ایک پاؤں پہلے کاٹا جاچکا تھا، تو حضرت عمر (رض) نے کہا، سنت یہ ہے (کہ اب تیسری مرتبہ میں) اس کا (دوسرا) ہاتھ کاٹا جائے۔