3520 ۔ حضرت ابن عباس (رض) بیان کرتے ہیں : نبی کریم (صلی اللہ علیہ وآلہ وسلم) نے ارشاد فرمایا ہے : ثیبہ (بیوہ یا مطلقہ) اپنے معاملہ کی زیادہ حق دار ہے اور کنواری لڑکی سے اجازت لی جائے گی اس کا اذن اس کی خاموشی ہے۔ سعید بن سلمہ نے صالح بن کیسان کے حوالے سے اس کی متابعت کی ہے۔
معمر نے اس کی سند میں ان دونوں سے مختلف بات بیان کی ہے ، انھوں نے سند میں سے ایک شخص کا ذکر ساقط کردیا ہے۔ اسی طرح معمر نے اس روایت کے متن میں بھی ان دونوں سے مختلف بات نقل کی ہے اور روایت کو دوسرے الفاظ میں نقل کیا ہے ، تاہم اس میں انھیں وہم ہوا ہے کیونکہ ہر وہ راوی جس نے اسے عبداللہ بن فضل کے حوالے سے نقل کیا ہے اور ہر وہ راوی جس نے اسے عبداللہ بن فضل کے ساتھ نافع بن جبیر سے نقل کیا ہے ، ان سب نے معمر سے مختلف روایت نقل کی ہے اور ان سب راویوں کا معمر سے مختلف روایت کرنے پر اتفاق کرنا اس بات کی دلیل ہے کہ معمر کو اس بارے میں وہم ہوا ہے باقی اللہ بہتر جانتا ہے۔