3612 ۔ عروہ بن زبیر بیان کرتے ہیں : انھوں نے سیدہ عائشہ صدیقہ (رض) سے اللہ کے اس فرمان کے بارے میں دریافت کیا : اور اگر تمہیں اس بات کا اندیشہ ہو کہ تم یتیم لڑکیوں کے بارے میں انصاف سے کام نہیں لے سکو گے تو تمہیں جو خواتین پسند ہوں ، دو ، یا ، تین یا چار، ان کے ساتھ شادی کرلو۔
سیدہ عائشہ صدیقہ (رض) نے فرمایا : اے میرے بھتیجے ، اس سے مراد وہ یتیم لڑکی ہے جو کسی شخص کی زیر پرورش ہوتی تھی وہ لڑکی اس کے مال میں اس کی شریک ہوتی تھی، تو اس شخص کو اس لڑکی کے مال اور خوبصورتی میں دل چسپی ہوتی تو ولی اس لڑکی کے ساتھ شادی کرنا چاہتا تھا، تاکہ اسے مہر کے طور پر انصاف کے مطابق ادائیگی نہ کرنا پڑے۔ وہ (انصاف کے مطابق یعنی عام رواج سے کم) مہر ادا کرتا۔ تو لوگوں کو اس بات سے منع کردیا گیا کہ وہ اس طرح ان لڑکیوں کے ساتھ شادی کریں یاپھریہ ہے کہ وہ انصاف سے (یعنی عام رواج کے مطابق) انھیں مہراد اکریں ان لوگوں کو یہ حکم دیا گیا کہ وہ دوسری خواتین کے ساتھ شادی کرلیں۔
سیدہ عائشہ صدیقہ (رض) : پھر لوگوں نے نبی کریم (صلی اللہ علیہ وآلہ وسلم) سے سوالات کیے تو اللہ نے یہ آیت نازل کی۔
'' لوگ تم سے خواتین کے بارے میں دریافت کرتے ہیں تم فرمادو، ان کے بارے میں اللہ تعالیٰ تمہیں یہ حکم دیتا ہے اور یتیم لڑکیوں کے بارے میں کتاب کے جو احکام تلاوت کیے گئے ہیں جن یتیم لڑکیوں کو تم وہ چیز ادا نہیں کرتے جوان کے لیے مقرر کی گئی ہے اور تم اس کے ساتھ نکاح کرنے میں دل چسپی رکھتے ہو۔
سیدہ عائشہ صدیقہ (رض) : اس آیت میں اللہ تعالیٰ نے لوگوں کے لیے یہ حکم بیان کیا ہے ، اگر کوئی خوبصورت ہو اور مالدار بھی ہوتویہ لوگ اس کے ساتھ نکاح میں دل چسپی لیتے ہیں لیکن عام رواج کے مطابق اسے مکمل مہرادا نہیں کرتے ، لیکن اگر خوبصورتی اور مال کے اعتبار سے لڑکی میں کمی ہو تو یہ اس کے ساتھ شادی نہیں کرتے، بلکہ دوسری خواتین تلاش کرتے ہیں۔
سیدہ عائشہ صدیقہ (رض) : جب ان لوگوں کو ایسی لڑکیوں میں دلچسپی محسوس نہیں ہوتی اور وہ انھیں ترک کردیتے ہیں تو اب انھیں اس بات کا بھی حق نہیں ہوگا، کہ جب انھیں اس طرح کی لڑکیوں میں دل چسپی محسوس ہو تو وہ ان کے ساتھ شادی کرلیں، البتہ اگر مہر کے حوالے سے وہ ان کے ساتھ انصاف سے کام لیں اور پوری ادائیگی کریں (تو حکم مختلف ہوگا) ۔
ان کا مضمون باہمی طور پر قریب ہے۔