3638 ۔ حضرت عبداللہ بن عمر (رض) بیان کرتے ہیں : جب حضرت غیلان بن سلمہ ثقفی نے اسلام قبول کیا، اس وقت ان کی دس بیویاں تھیں، نبی کریم نے انھیں یہ ہدایت کی وہ اس میں سے چار کو اپنے ساتھ رکھیں۔
حضرت عمر (رض) کے زمانے میں حضرت غیلان بن سلمہ نے ان خواتین کو طلاق دے دی، تو حضرت عمر (رض) نے انھیں یہ ہدایت کی کہ وہ ان خواتین سے رجوع کرلیں، حضرت عمر (رض) نے فرمایا اگر تم مرگئے تو میں ان خواتین کو تمہاراوارث قرار دوں گا، اور میں تمہاری قبر کو سنگسار کراؤں گا، بالکل اسی طرح جیسے ابورغال کی قبر کو سنگسار کردیا گیا تھا۔
ایک روایت میں یہ الفاظ ہیں : حضرت عمر (رض) نے ان سے فرمایا : تم ان سے رجوع کرلو ورنہ میں انھیں تمہارے مال کی وارث قرار دوں گا، اور تمہاری قبر کے بارے میں حکم دوں گا۔
ایک روایت میں یہ الفاظ ہیں : انھوں نے اسلام قبول کیا تو ان کے ساتھ ان خواتین نے بھی اسلام قبول کرلیا۔