ابو عمار بیان کرتے ہیں : انھیں نبی اکرم (صلی اللہ علیہ وآلہ وسلم) کے کچھ صحابہ کرام (رض) کی زیارت کا شرف حاصل ہے، وہ بیان کرتے ہیں : ایک مرتبہ حضرت ابوامامہ (رض) نے حضرت عمرو بن عبسہ (رض) سے کہا : آپ کس بات کے دعوے دار ہیں ؟ آپ کو بہت پہلے اسلام قبول کرنے کا شرف حاصل ہے ؟ (اس کے بعد انھوں نے پورا واقعہ بیان کیا ہے)
حضرت عمرو بن عبسہ (رض) نے یہ بات بیان کی : میں نے عرض کی : یارسول اللہ ! آپ مجھے وضو کے بارے میں کچھ بتائیے ! تو نبی اکرم (صلی اللہ علیہ وآلہ وسلم) نے ارشاد فرمایا : جو بھی شخص وضو کرنے لگے تو وہ پہلے کلی کرے، پھر ناک میں پانی ڈالے اور ناک صاف کرے تو اس میں اس سے اس کے تمام گناہ، یہاں تک کہ اس کے ناک کے بانسے سے ، تمام گناہ پانی سمیت باہر نکل جاتے ہیں، پھر جب وہ اپنا چہرہ دھوتا ہے، جیسا کہ اللہ تعالیٰ نے اسے حکم دیا ہے، تو اس کے چہرے میں سے تمام گناہ، یہاں تک کہ اس کی داڑھی کے کناروں میں سے بھی، پانی کے ہمراہ گرجاتے ہیں، پھر جب وہ دونوں بازؤ وں کو کہنیوں تک دھوتا ہے، تو اس کے دونوں بازؤ وں میں سے، یہاں تک کہ ناخنوں میں سے بھی، تمام گناہ پانی سمیت گرجاتے ہیں، پھر جب وہ اپنے سر کا مسح کرتا ہے ، تو اس کے بالوں کے کناروں سمیت، اس کے سر کے تمام گناہ پانی سمیت گرجاتے ہیں، پھر جب وہ اپنے دونوں پاؤں ٹخنوں تک دھوتا ہے، جیسا کہ اللہ تعالیٰ نے اسے حکم دیا ہے ، تو اس کے دونوں پاؤں کی انگلیوں کے کناروں میں سے بھی تمام گناہ پانی سمیت گرجاتے ہیں، پھر وہ اٹھتا ہے اور اللہ تعالیٰ کی اس کی شان کے مطابق اس کی حمد بیان کرتا ہے، اس کی ثناء بیان کرتا ہے، پھر دو رکعت نماز ادا کرتا ہے، تو وہ اپنے گناہوں سے (اس طرح پاک) ہوجاتا ہے، جیسے اس دن تھا جب اس کی والدہ نے اسے جنم دیا تھا۔