3790 ۔ سیدہ عائشہ صدیقہ (رض) بیان کرتی ہیں : حضرت سعد بن ابی وقاص (رض) اور حضرت عبدابن زمعہ (رض) نے زمعہ کی کنیز کے بیٹے کے بارے میں نبی کریم (صلی اللہ علیہ وآلہ وسلم) کی خدمت میں مقدمہ پیش کیا حضرت سعد (رض) نے عرض کی یارسول اللہ میرے بھائی عتبہ نے مجھے (اس بچے کو اپنی سرپرستی) میں لینے کی ہدایت کی تھی اس نے کہا تھا، جب تم مکہ میں داخل ہوجاؤ تو زمعہ کی کنیز کے بیٹے کو حاصل کرلینا کیونکہ وہ میری (ناجائز) اولاد ہے ، عبد بن زمعہ (رض) نے عرض کی یارسول اللہ (وہ لڑکامیرابھائی ہے ، جو میرے والد کی کنیز کا بیٹا ہے اور میرے باپ کے بستر پر پیدا ہوا ہے ۔
نبی کریم (صلی اللہ علیہ وآلہ وسلم) نے (اس بچے) کو عتبہ کے ساتھ واضح مشابہت ملاحظہ کی، لیکن آپ (صلی اللہ علیہ وآلہ وسلم) نے فرمایا اے عبدزمعہ یہ تمہیں ملے گا، کیونکہ اولاد صاحب فراش کی شمار ہوتی ہے اور اے سودہ بنت زمعہ تم اس سے پردہ کرو۔
امام مالک ، صالح بن کیسان، ابن اسحاق ، شعیب بن ابوحمزہ، ابن جریج، عقیل، زہری، کا بھتیجا، معمر بن راشد، یونس ، لیث بن سعد ، سفیان بن حسین اور دیگرراویوں نے اس کی متابعت کی ہے۔
مالک ، معمر، لیث، صالح بن کیسان ، ابن اسحاق اور دیگرراویوں کی روایت میں یہ الفاظ ہیں :'' اس کے بعد اس بچے نے زندگی بھر کبھی بھی سیدہ بنت زمعہ (رض) کو نہیں دیکھا۔