3862 ۔ مجاہد بیان کرتے ہیں : ایک قریشی حضرت عبداللہ بن عباس (رض) کی خدمت میں حاضر ہوا اور بولا اے ابوعباس : میں نے غصہ کے عالم میں اپنی بیوی کو تین طلاقیں دے دی ہیں، تو حضرت ابن عباس (رض) نے فرمایا : جو چیز تمہارے لیے حرام ہوگئی ہے ابوعباس اسے تمہارے لیے حلال نہیں کرسکتا، تم نے اپنے پروردگار کی نافرمانی کی اور اپنی بیوی کو اپنے اوپر حرام کرلیا، تم اللہ سے ڈرے نہیں ورنہ وہ تمہارے لیے کوئی گنجائش پیدا کردیتا ۔ پھر حضرت ابن عباس (رض) نے یہ آیت تلاوت کی :
'' اور جب تم نے خواتین کو طلاق دینی ہو تو انھیں طلاق دو ''۔ یعنی ان کی عدت سے پہلے جب وہ طہر کی حالت میں ہوں اور ان کے ساتھ صحبت نہ کی گئی ہو۔
سیف نامی راوی نے یہ بات بیان کی ہے : یہ (مذکورہ جملہ ) تلاوت کا حصہ نہیں ہے بلکہ (قرآن کے الفاظ ) کی وضاحت ہے۔
سعید بن جبیر بیان کرتے ہیں : ایک شخص حضرت عبداللہ بن عباس (رض) کی خدمت میں حاضرہو اور بولا میں نے اپنی بیوی کو ایک ہزار طلاقیں دے دی ہیں تو حضرت ابن عباس (رض) نے فرمایا : تین طلاقوں کی وجہ سے تمہاری بیوی تم پر حرام ہوگئی ہے ، اور بقیہ طلاقیں تمہارے لیے گناہ بن گئی ہیں، کیونکہ تم نے اللہ کی آیات کا مذاق اڑایا ہے۔