3907 ۔ سوید بن غلفہ بیان کرتے ہیں جب حضرت علی (رض) کا انتقال ہوگیا، تو عائشہ بنت خلیفہ خثعمیہ جو حضرت امام حسن (رض) کی اہلیہ تھی ، انھوں نے حضرت امام حسن (رض) سے کہا آپ کو امیرالمومنین بننا مبارک ہو، تو حضرت امام حسن (رض) سے ان سے فرمایا : تم امیرالمومنین (یعنی حضرت علی (رض)) کی شہادت پر مجھے مبارک باد دے رہی ہو چلی جاؤ تمہیں طلاق ہے۔ اس عورت نے (روتے ہوئے) اپنا کپڑا منہ پر رکھا اور بولی اے اللہ میرا مقصد تو صرف بھلائی تھا (یعنی میرا یہ ارادہ نہیں تھا) ۔
بعد میں حضرت امام حسن نے متاع کے طور پر اس خاتون کو دس ہزار درہم یا دینار اور مہر کا بقیہ حصہ بھجوایا، جب یہ چیزیں اس کے سامنے رکھی گئیں تو وہ روپڑی اور بولی جدا ہوجانے والے محبوب کے مقابلے میں یہ سب کچھ بہت تھوڑا سا ہے۔ جب قاصد نے حضرت امام حسن کو اس بارے میں بتایا تو انھوں نے فرمایا : اگر میں نے طلاق کو اس عورت کے لیے ثابت نہ کیا ہوتا تو اس سے رجوع کرلیتا۔ لیکن میں نے نبی کریم (صلی اللہ علیہ وآلہ وسلم) کو یہ ارشاد فرماتے ہوئے سنا ہے جو شخص اپنی بیوی کو تین طلاقیں دے یوں کہ ہر طہر میں ایک طلاق دے یا ہر مہینے میں ایک طلاق دے یاتین طلاقیں ایک ساتھ دیدے تو وہ عورت اس شخص کے لیے اس وقت تک حلال نہ ہوگی، جب تک دوسرے شخص سے شادی کرکے (مطلقہ یابیوہ) نہ ہوجائے۔