4029 ۔ ہزیل بن شرحبیل بیان کرتے ہیں : کہ حضرت ابوموسی اشعری (رض) سے ایسے شخص کے بارے میں دریافت کیا گیا جو پس ماندگان میں ایک بیٹی ، ایک پوتی، اور ایک سگی بہن کو چھوڑ کرجاتا ہے ، توحضڑت ابوموسی نے فرمایا اس کی بیٹی کو نصف حصہ ملے گا، اور جو باقی مال بچ جائے گا وہ اس کی بہن کو مل جائے گا، پھر حضرت ابوموسی اشعری نے فرمایا : حضرت عبداللہ بن مسعود (رض) بھی اسی کے مطابق جواب دیں گے جو میں نے کہا ہے۔ لوگوں نے حضرت عبداللہ بن مسعود (رض) سے اس بارے میں دریافت کیا اور انھیں حضرت ابوموسی اشعری (رض) کے جواب کے بارے میں بھی بتایا، تو حضرت عبداللہ بن مسعود (رض) نے فرمایا ، میں یہ کیسے کہہ سکتا ہوں جبکہ میں نے نبی کریم (صلی اللہ علیہ وآلہ وسلم) کو یہ ارشاد فرماتے ہوئے سنا ہے (ایسی صورت حال میں) بیٹی کو نصف ملے گا پوتی کو چھٹا حصہ ملے گا، اس طرح دوتہائی حصے مکمل ہوجائیں گے اور جو باقی بچ جائے گا وہ سگی بہن کو مل جائے گا۔