4135 ۔ حضرت عبداللہ بن عباس (رض) بیان کرتے ہیں : جب مشرکین غزوہ احد میں مارے جانے والوں کو چھوڑ کر واپس چلے گئے تو نبی اکرم (صلی اللہ علیہ وآلہ وسلم) نے وہ چیز ملاحظہ فرمائی جس سے آپ کو بہت تکلیف ہوئی ‘ آپ نے حضرت حمزہ (رض) کو دیکھا کہ ان کا پیٹ چیر دیا گیا تھا ‘ ناک کاٹ دی گئی تھی ‘ دونوں کان الگ کردیئے گئے تھے۔ آپ نے ارشاد فرمایا : اگر خواتین کے غم گین ہونے کا اندیشہ نہ ہوتا ‘ یا یہ بات میرے بعد رواج نہ بن جاتی ‘ تو میں انھیں یونہی چھوڑ دیتا ‘ یہاں تک کہ اللہ تعالیٰ درندوں اور پرندوں کے پیٹوں میں سے انھیں زندہ کرتا ‘ میں ان کی جگہ ستر آدمیوں کا مثلہ کروں گا۔
پھر نبی اکرم (صلی اللہ علیہ وآلہ وسلم) نے اپنی چادر منگوائی اور اس کے ذریعے حضرت حمزہ (رض) کے چہرے کو ڈھانپ دیاتو حضرت حمزہ (رض) کے پاؤں ظاہر ہوگئے ‘ نبی اکرم (صلی اللہ علیہ وآلہ وسلم) نے ان کے چہرے کو ڈھانپ دیا اور ان کے پاؤں پر گھاس رکھ دی ‘ پھر آپ نے انھیں آگے کیا اور ان پر دس تکبیریں کہیں ‘ اس کے بعد ایک ‘ ایک شخص کو لایا جاتا رہا اور رکھا جاتارہا ‘ حضرت حمزہ (رض) کی میت وہیں پڑی رہی ‘ یہاں تک کہ نبی اکرم (صلی اللہ علیہ وآلہ وسلم) نے ان پر ستر مرتبہ نماز ادا کی کیونکہ غزوہ احد کے شہداء کی تعداد ستر تھی ‘ جب ان لوگوں کو دفن کردیا گیا اور اپ اس سے فارغ ہوگئے تو یہ آیت نازل ہوئی :” تم اپنے پروردگار کے راستے کی طرف حکمت اور اچھے وعظ کے ذریعے دعوت دو “۔ یہ آیت یہاں تک ہے : تم صبر سے کام لو ‘ تمہارا صبر کرنا صرف اللہ تعالیٰ کی مدد سے ہی ہے “۔
تو نبی اکرم (صلی اللہ علیہ وآلہ وسلم) نے صبر سے کام لیا اور آپ نے کسی شخص کا مثلہ نہیں کیا۔
اس روایت کو صرف اسماعیل بن عیاش نامی راوی نے نقل کیا ہے اور اس نے شامیوں کے علاوہ دیگر راویوں سے جو روایات نقل کی ہیں ‘ ان میں اضطراب پایاجاتا ہے۔