4137 ۔ عیسیٰ بن حارث بیان کرتے ہیں کہ شریح بن حارث کے بھائی کی ایک ام ولد تھی ‘ اس نے ایک بچی کو جنم دیا ‘ پھر اس بچی کی شادی ہوگئی ‘ اس نے ایک لڑکے کو جنم دیا پھر وہ ام ولد فوت ہوگئی۔ راوی بیان کرتے ہیں کہ اس کی وراثت کے بارے میں شریح بن حارث اور اس ام ولد کے نواسے نے اختلاف کیا ‘ وہ اپنا مقدمہ لے کر قاضی شریح کے پاس گئے۔ شریح بن حارث نے قاضی شریح سے کہا کہ اللہ کی کتاب میں اس لڑکے کی کوئی وراثت نہیں ہے ‘ کیونکہ یہ اس عورت کانواسہ ہے۔ راوی بیان کرتے ہیں : توقاضی شریح نے اس عورت کی وراثت اس نواسے کو دینے کا حکم دیا اور بولے :(ارشاد باری تعالیٰ ہے :)” نسبی رشتے دار اللہ کی کتاب میں ایک دوسرے کے (وارث بنتے ہیں) “۔
تو میسرہ بن یزید سوار ہو کر حضرت عبداللہ بن زبیر کے پاس گئے اور انھیں اس بارے میں بتایا جو قاضی شریح نے فیصلہ دیا تھا تو حضرت عبداللہ بن زبیر نے قاضی شریح کو ایک خط لکھا ‘ میسرہ بن یزید نے میرے سامنے اس بات کا تذکرہ کیا ہے کہ تم نے ایسی صورت حال میں یہ آیت پڑھی ہے :
” نسبی رشتے دار اللہ کی کتاب میں ایک دوسرے کے وارث بنتے ہیں “۔ یہ آیت عصبہ رشتے داروں کے بارے میں ہے اور اس زمانے سے تعلق رکھتی ہے کہ جب لوگ ایک دوسرے کے ساتھ معاہدہ کرلیتے تھے (یعنی منہ بولے بھائی بن جایا کرتے تھے) آدمی کہتا تھا : تم میرے وارث بن جانا اور میں تمہاراوارث بن جاؤں گا ‘ جب یہ آیت نازل ہوئی تو اس طرز عمل کو ترک کردیا گیا۔
پھر میسرہ بن یزید وہ خط لے کر قاضی شریح کے پاس آئے انھوں نے اسے پڑھنے کے بعد اپنا فیصلہ واپس لینے سے انکار کردیا اور بولے : اس شخص نے اس ام ولد کو اس کے پیٹ میں موجود (بچے کی وجہ سے آزاد کیا تھا) ۔