4253 ۔ حضرت ابورافع (رض) بیان کرتے ہیں : میری آزاد کردہ کنیز نے یہ کہا : میں آپ کے اور آپ کی اہلیہ کے درمیان علیحدگی ضرورکرواؤں گی ‘ اگر میں ایسانہ کرسکی تو اس کا تمام مال خانہ کعبہ کے نام ہوگا اور وہ اس دن یہودی ہوگی ‘ عیسائی ہوگی یامجوسی ہوگی ‘ اگر وہ آپ کے اور آپ کی اہلیہ کے درمیان فرق نہ پیدا کرسکی۔
حضرت ابورافع (رض) کہتے ہیں : میں ام المومنین سیدہ ام سلمہ (رض) کی خدمت میں حاضرہوا۔ میں نے عرض کی : میری آزاد کردہ کنیز یہ چاہتی ہے کہ میرے اور میری بیوی کے درمیان علیحدگی پیداکردے ‘ تو سیدہ ام سلمہ رضی اللہ عنہا نے کہا کہ تم اپنی کنیز کے پاس جاؤ اور اس سے کہو کہ تمہارے لیے ایساکرناجائز نہیں ہے ‘ میں اس کے بعد واپس چلا گیا اور حضرت عبداللہ بن عمر (رض) کے پاس آیا اور انھیں اس بارے میں بتایا ‘ وہ تشریف لائے ‘ یہاں تک کہ دروازے تک آئے اور فرمایا : یہاں ہاروت اور ماروت ہیں۔ اس کنیزنے کہا کہ میں نے اپنا سارامال خانہ کعبہ کے خزانے کے نام کردیا ہے۔ حضرت عبداللہ بن عمر (رض) نے دریافت کیا : پھر تم کیا گھاؤگی ؟ اس نے کہا : میں نے یہ کہا ہے کہ میں اس دن یہودی ہوں گی یا عیسائی ہوں گی یا اس دن مجوسی ہوں گی (اگر میں نے ان کے درمیان جدائی نہ کی) ۔ تو حضرت عبداللہ بن عمر (رض) نے فرمایا : اگر تم نے یہودیت اختیار کی تو تمہیں قتل کردیا جائے گا ‘ اگر تم نے عیسائیت اختیار کی تو تمہیں قتل کردیا جائے گا اور اگر تم نے مجوسیت اختیار کی تو تمہیں قتل کردیا جائے گا۔ وہ کنیزبولی : پھر آپ مجھے کیا حکم دیتے ہیں ؟ انھوں نے فرمایا : تم اپنی قسم کا کفارہ دو اور اس شخص اور اس کی بیوی کے درمیان علیحدگی نہ کرواؤ۔