4311 ۔ حضرت عمران بن حصین (رض) بیان کرتے ہیں : عضباء نامی اونٹنی بنوعقیل کے ایک شخص کی ملکیت تھی۔ اس شخص کو قیدی بنایا گیا۔ اس شخص کے ساتھ اس کی اونٹنی عضباء کو بھی قیدی بنادیا گیا۔ نبی اکرم (صلی اللہ علیہ وآلہ وسلم) اس کے پاس تشریف لائے ‘ آپ اس وقت ایک گدھے پر سوار تھے جس پر کپڑاڈالا ہوا تھا۔ اس نے عرض کی : اے حضرت محمد (صلی اللہ علیہ وآلہ وسلم) ! آپ لوگوں نے کیس بنیاد پر مجھے پکڑا ہے اور کس وجہ سے عضباء کو پکڑا ہے ‘ جبکہ میں مسلمان ہوں ؟ نبی اکرم (صلی اللہ علیہ وآلہ وسلم) نے اس سے فرمایا : اگر تم یہ بات کہہ رہے ہو ‘ تو تم اپنے معاملے کے مالک ہو (یعنی آزاد ہو) اور تمہیں مکمل فلاح نصیب ہوگی۔ راوی کہتے ہیں : پھر نبی اکرم (صلی اللہ علیہ وآلہ وسلم) تشریف لے گئے تو وہ شخص (پیچھے سے) بولا : حضرت محمد (صلی اللہ علیہ وآلہ وسلم) میں بھوکاہوں ‘ مجھے کچھ کھانے کے لیے دیں۔ میں پیاساہوں آپ مجھے کچھ پینے کے لیے دیں ‘ تو نبی اکرم (صلی اللہ علیہ وآلہ وسلم) نے ارشاد فرمایا : یہ تمہاری ضرورت کا سامان ہے۔
پھر اس شخص کو دو آدمیوں کے فدیے کے بدلے میں چھوڑ دیا گیا۔ نبی اکرم (صلی اللہ علیہ وآلہ وسلم) نے عضباء نامی اونٹنی کو اپنے سواری کے لیے رکھ دیا کیونکہ وہ تیزسفر کیا کرتی تھی۔ ایک مرتبہ کچھ مشرکین نے مدینہ منورہ کے ایک حصے پر رات کے وقت ڈاکہ ڈالا اور ایک مسلمان عورت کو قیدی کرلیا۔ مشرکین نے اپنی کھلی جگہ پر اپنے اونٹوں کو آرام کرنے کے لیے بٹھادیا ‘ جب رات ہوئی اور وہ لوگ سوگئے تو وہ عورت جس اونٹ کے پاس گئی اس نے آواز نکالی وہ اس اونٹنی عضباء کے پاس آئی تو اس نے آواز نہیں نکالی۔ وہ بڑی فرمان بردار اونٹنی تھی ‘ وہ عورت اس اونٹنی پر سوار ہو کر مدینہ منورہ آگئی۔ اس نے نذرمانی کہ اگر اللہ تعالیٰ نے اسے نجات نصیب کردی تو وہ اس اونٹنی کو قربان کردے گی ‘ جب وہ مدینہ منورہ پہنچی اور لوگوں نے نبی اکرم (صلی اللہ علیہ وآلہ وسلم) کی اونٹنی کو پہچان لیاتو بولے : یہ توعضباء ہے جو نبی اکرم (صلی اللہ علیہ وآلہ وسلم) کی اونٹنی ہے۔
راوی بیان کرتے ہیں : پھر اس عورت کو نبی اکرم (صلی اللہ علیہ وآلہ وسلم) کی خدمت میں لایا گیا اور اس کی نذر کے بارے میں آپ کو بتایا گیا تو آپ نے ارشاد فرمایا : تم نے بہت برابدلہ دیا ہے۔ معصیت کے کام میں کوئی نذر نہیں ہوتی اور آدمی جس چیز کا مالک نہ ہو ‘ اس کے بارے میں کوئی نذر نہیں ہوتی۔