4334 ۔ حضرت عبداللہ بن عمر (رض) بیان کرتے ہیں کہ حضرت عمر (رض) نے یہ بات بیان کی ہے کہ مجھے خیبر میں ایک زمین ملی تو میں نے عرض کی : یارسول اللہ ! مجھے ایسی زمین ملی ہے کہ میرے نزدیک اس سے بہترین زمین مجھے کبھی نہیں ملی۔ نبی اکرم (صلی اللہ علیہ وآلہ وسلم) نے ارشاد فرمایا کہ اگر تم چاہوتو اس کو صدقہ کردو اور اصل زمین اپنے پاس رہنے دو۔ راوی کہتے ہیں : تو حضرت عمر (رض) نے اس کو اس طرح کردیا کہ اسے فروخت نہیں کیا جاسکتا تھا ‘ ہبہ نہیں کیا جاسکتا تھا ‘ وراثت میں تقسیم نہیں کیا جاسکتا تھا اور اس کا پھل غریبوں ‘ مسکینوں ‘ مسافروں ‘ مجاہدین ‘ غلاموں اور مہمانوں کے لیے صدقہ تھا۔ جو شخص اس کا نگران تھے اسے کوئی گناہ نہ ہوتا ‘ اگر وہ خود اس میں سے کچھ کھالیتایا اپنے کسی دوست کو کھلا دیتا ‘ جبکہ وہ مال جمع کرنے والانہ ہوتا۔
حضرت عمر (رض) نے یہ وصیت سیدہ حفصہ (رض) کو کی تھی اور پھر اس کے بعد حضرت عمر (رض) کی اولاد سے تعلق رکھنے والے بڑی عمر کے افراد کو کی تھی۔
روایت کے یہ الفاظ ابومسعودنامی راوی کے ہیں ‘ تاہم دیگرراویوں نے اسے نقل کرنے میں کچھ لفظی اختلاف کیا ہے۔